މާރޗު 17 ގައި ބާއްވަން ނިންމާފައިވާ ރައްޔިތުންގެ މަޖުލީހުގެ އިންތިހާބު އަންނަ އޭޕްރީލް މަހުގެ 21 ވަނަ ދުވަހަށް ފަސްކުރަން އިލެކްޝަން ކޮމިޝަނުން މިރޭ ނިންމައިފަ އެވެ.
ކޮމިޝަނުން އެގޮތަށް ނިންމީ މާޗް މަހުގެ 17 ވަނަ ދުވަހަށް ތާވަލުކޮށްފައިވާ ރައްޔިތުންގެ މަޖިލީހުގެ އިންތިހާބު ރޯދަ މަސް ތެރޭ ނުބޭއްވޭ ގޮތަށް އިންތިހާބުތަކާ ބެހޭ ގާނޫނަށް ގެނައި އިސްލާހުގެ ރައީސް ޑރ. މުހައްމަދު މުއިއްޒު ތަސްދީގު ކުރެއްވުމާ އެކު އިލެކްޝަން ކޮމިޝަނުން މިރޭ ބޭއްވި ކުއްލި ބައްދަލުވުމުގަ އެވެ.
އިލެކްޝަން ކޮމިޝަނުން ނިންމީ އިންތިހާބު ބޭއްވޭނެ އެންމެ އަވަސް ތާރީހު ކަމަށްވާ 21 އެޕްރީލު ވާ އާދިއްތަ ދުވަހު އިންތިހާބު ބޭއްވުމަށެވެ. މި ގޮތުން އިންތިހާބު އޮންނާނީ އެ ދުވަހުގެ ހެނދުނު 8:00 ފެށިގެން ހަވީރު 4:00 އަށެވެ.
ރޯދަމަސް ތެރޭގައި އިންތިހާބު ނުބޭއްވުމަށް ރައްޔިތުންގެ މަޖުލީހުގެ ކޮމެޓީންނާއި އިލެކްޝަން ކޮމިޝަނަށް ލަފާދޭ ކޮމެޓީންވެސް އެތައް ފަހަރަކު ވަނީ އިލެކްޝަން ކޮމިޝަނަށް އިލްތިމާސްކޮށްފައެވެ. އެ ކޮމިޝަނުގެ ބައެއް މެމްބަރުންވެސް ބޭނުންވަނީ ރޯދަމަހުގެ ފަހުން އިންތިހާބު ބޭއްވުމަށެވެ. ނަމަވެސް ރައީސް ޑރ.މުއިއްޒާއި އިލެކްޝަން ކޮމިޝަނުގެ ރައީސް ފުއާދު ތައުފީގު ބޭނުންފުޅުވީ ވީހާވެސް އަވަހަށް (ރޯދަމަހުވެސް) އިންތިހާބު ބޭއްވުމަށެވެ. މަޖުލީހުން ގާނޫނަށް އިސްލާހު ގެނައީ އީސީގެ ރައީސް ފުއާދު ތައުފީގު ތަކުރާރުކޮށް އެކަމަށް ދެކޮޅު ހަދައި ސަރުކާރުން ބޭނުންވި ތާރީހުގައި އިންތިހާބު ބޭއްވުމަށް ނިންމެވުމުންނެވެ.
ރައްޔިތުން މަޖުލީހުގެ މެމްބަރުންނާއި އިދިކޮޅު ސިޔާސީ ޕާޓީތަކުން ބުނަމުންދަނީ ރޯދަމަހު އިންތިހާބު ބޭއްވުމުން ވޯޓު ލުމަށް ނިކުންނަ މީހުންގެ އަދަދު މަދުވާނެ ކަމަށެެވެ. އެހެންކަމުން ގިނަބަޔަކު ވޯޓުގައި ބައިވެރިވުމަށް ފުރުސަތު ދިނުމުގެ ގޮތުން ރޯދައިގެ ފަހުން އިންތިހާބު ބޭއްވުމަށެވެ.
