މ.ރަތްމަންދޫ ފެނަކައިގެ ޑެޕިއުޓީ މެނާޖަރުކަމުގެ މަގާމުގައި ހުރި މުހައްމަދު ޝިފާއު މަގާމުން ވަކިކޮށްފިއެވެ.
އެ ރަށުން ވާހަކަދެއްކި މީހަކު ބުނީ ޝިފާއު ފޭސްބުކް ސްޓޭޓަސްގައި ލިޔެފައިވަނީ ރަށަށް އެންމެ ބޮޑަށް ބޭނުންވާ ފެނާއި ނަރުދަމާ ނިޒާމުގެ ވާހަކަ ކަމަށެވެ. އެ މަސައްކަތް ހުއްޓިފައިވާތީ ރަށު ރައްޔިތުންގެ ކަންބޮޑުވުން ކުރިންވެސް ހިއްސާ ކުރުމުން އޭނާގެ މަގާމު ދަށްކޮށް، މުސާރަ ނުލިބޭގޮތަށް ސަސްޕެންޝަނެއްގައި ބެހެއްޓުމަށް ފަހު ވަޒީފާއިން ވަކިކޮށްފައިވަނީ އިއްޔެއެވެ.
ޝިފާއު ސޯސަލް މީޑިއާގައި ޝާއިއުކުރި މެސެޖުގައި ބުނެފައިވަނީ ރައީސް އިބްރާހިމް މުހައްމަދު ސޯލިހުގެ ސަރުކާރުން މ.ރަތްމަންދޫގައި ފަށާފައިވާ ފެނާއި ނަރުދަމާގެ މަސައްކަތް ވަނީ ގާތްގަނޑަކަށް %90 ނިމިފައިކަމަށާއި ސަރުކާރު ބަދަލުވިއިރު އެކަމަށް ބޭނުންވާ ސާމާނުވެސް ވަނީ ރަށަށް ގެނެވިފައެވެ. އެހެންވިޔަސް އާބާދީކުޑަވުމުން އެ މަސައްކަތްވަނީ ހުއްޓާލާފައެވެ. މިހާރުގެ ރައީސް ޑރ.މުއިއްޒަކީ ހަމައެކަނި މާލޭ ރައީސްތޯ ވެސް ވަނީ ސުވާލު އުފައްދާފައެވެ. މީގެ އިތުރުން ދާއިރާގެ މިހާރުގެ މެމްބަރު އިކްރާމު ހަސަން މި ކަން ބައްލަވާދެއްވުމަށްވެސް ޝިފާއު އިލްތިމާސްކޮށްފައިވެއެވެ.
މި ކަމާ ބޭހޭގޮތުން ފެނަކައިން އެއްވެސް މައުލޫމާތެއް ނުދެއެވެ. މި ދުވަސްކޮޅު ގިނަ އަދަދެއްގެ ބަޔަކު ފެނަކަ ވަޒީފާއިން ވަކިކޮށް ސަރުކާރުން ތާއިދުކުރާ މަޖުލިސް މެމްބަރުންނަށް ވަޒީފާދޭ ކަމަށް ގިނަ ފަރާތްތަކުން އަންނަނީ ތުހުމަތު ކުރަމުންނެވެ.
