ރައީސް ޑރ.މުހައްމަދު މުއިއްޒުގެ ސަރުކާރާއި ހަވާލުވެ، ބައެއް ކުންފުނިތަކުގައި އިތުރަށް މުއައްޒަފުންނަަށް ވަޒީފާދީފައިވާ ކަމަށްބުނެ، އެންމެ ގިނަ މުއައްޒަފުން ވަކިކުރި ފެނަކައިން އަނެއްކާވެސް ވަޒީފާތަކެއް ހަމަޖެއްސުމުން އާއްމުންގެ ފާޑުކިޔުން އަމާޒުވެއްޖެއެވެ. ފެނަކައިން އެންމެ ގިނަ އަދަދަކަށް ވަޒީފާއިން ވަކިކުރީ ހއ.ދިއްދޫއިންނެވެ. އެ ރަށުން ވާހަކަދެއްކި މީހަކު ބުނީ އެ މުއައްޒަފުން ވަކިކުރި އަދަދަށް އަނެއްކާވެސް ފެނަކައަށް މުއައްޒަފުންނަށް ވަޒީފާދޭން ފަށާފައިވާ ކަމަށެވެ. އެގޮތުން ހަމައެކަނި އެ އަަތޮޅު ވަށަފަރުންވެސް އެއް ދުވަސްތެރޭގައި 11 މީހަކަށް އަލަށް ވަޒީފާދީފައިވާ ކަމަށެވެ. މީގެ އިތުރުން ކުރިނބީގައި ވެސް ގިނަ އަދަދެއްގެ ބަޔަކަށް ވަޒީފާތަކެއް ދެނީ ފެނަކައިގަ މަސައްކަތްކުރި މުއައްޒަފުންތަކެއް ވަކި ކުރުމަށް ފަހުގައެވެ. ކުރިނބީ ޒުވާނަކު ސޯސަލް މީޑިއާގައި ޕޯސްޓުކޮށްފައިވާ ވީޑިއޯއެއްގައި ބުނެފައިވަނީ މަޖުލިސް އިންތިހާބުގައި ސަރުކާރުން ބުނާ ކެންޑީޑޭޓަށް ވޯޓު ނުލާނެ ކަމަށް ބެލެވޭ މުއައްޒަފުން ވަކި ކުރުމަށް ފަހު، ކެންޑިޑޭޓުގެ ކެމްޕޭނުގައި އުޅޭ ފަރާތްތަކަށް ވަޒީފާތައް ދެމުން އަންނަ ކަމަށެވެ. މި ވަޒީފާތައް ދެނީ އެއްވެސް ގޮތަކަށް އިއުލާން ކުރުމެއްނެތި އެ ރަށުން އެހެން ބަޔަކަށް އެ މަގާމަށް ކުރިމަތިލުމަށް ފުރުސަތުވެސް ނުދީއެވެ.
ފެނަކައިން މުއައްޒަފުން ވަކިކުރާ މައްސަލައިގައި މީގެ ކުރިން ރައްޔިތުންގެ މަޖުލީހަށް ވަނީ ކުއްލި މައްސަލައެއްވެސް ހުށައަޅާފައެެވެ. އެ މައްސަލާގައި ޖަވާބުދެމުން އެމްޑީ މުއާޒު ވިދާޅުވީ ފެނަކައިން ވަޒީފާއިން ވަކި ކުރަމުންދަނީ ކޮންޓްރެކްޓު ހަމަވެފައިވާ މުއައްޒަފުންނާއި އެއްވެސް މަސައްކަތެއް ނެތް ބައެއް ކަމަށެެވެ. ފެނަކައިގެ މަސައްކަތަށްވުރެ އިތުރަށް މުއައްޒަފުބް ތިބި ކަމަށާއި އެކަމުގެ ސަބަބުން ކުންފުނި ދަރަނި އިތުރަށް ބޮޑުވަމުން އަންނަ ކަމަށެވެ. މުއާޒަށް ރައްދު ދެމުން މަޖުލީހުގެ މެމްބަރަކު ވިދާޅުވީ މުޅި ރާއްޖޭގެ ހުރިތާ ރަށަކަށް ބެލިއަސް ފެނަކައިން ވަޒީފާއިން މުއައްޒަފުން ވަކިނުކުރާ ރަށެއް ނެތް ކަމަށެވެ. މީގެ ތެރޭގައި ގިނައިން ތިބޭ ސަަރުކާރަށް ތާއިދު ނުކުރާ ކަމަށް ބެލެވިގެން ވަޒީފާއިން ވަކިކުރާ މުއައްޒަފުން ކަމަށެވެ. މި ފަހުން މިގޮތަށް ވަޒީފާއިން ވަކިކުރި މުއައްޒަފުންނަށް ފެނަކައިން ފޮނުވާފައިވާ ސިޓީތަކުގެ ކޮޕީތައް އަންނަނީ ސޯސަލް މީޑިއާގައި ދައުރުވަމުންނެވެ.
