އިންޑިއާގެ ބޮޑުވަޒީރު ނަރެންދުރަ މޯދީއަށް މަލާމަތްކޮށް ފުރައްސާރަކުރުމުގެ ސަބަބުން ސަސްޕެންޝަނުގައި ޔޫތު މިނިސްޓްރީގެ ޑެޕިއުޓީ މިނިސްޓަރ ފާތުމަތު ޝިއުނާ ނުކުޅެދޭ ޒުވާނަކަށް ފުރައްސާރަކޮށް މަލާމަތް ކުރުމުން އާއްމުންގެ ފާޑުކިޔުން އަމާޒުވެއްޖެއެވެ.
އޮސްޓްރޭލިޔާގައި ކިޔަވަމުންދާ މުހައްމަދު ދީދީ (މުތޫ) އަކީ ސެރީބްރަލް ޕަލްސީ ބަލީގެ ސަބަބުން ހާއްސަ އެހީއަށް ބޭނުންވާ ޒުވާނެކެވެ. އޮސްޓްރޭލިޔާގައި ތައުލީމު ހާސިލުކުރަމުންދާއިރު ދިމާވާ ކަންކަމާއި އަދި ނުކުޅޭ މީހުންނަށް ބޭނުންވާ ކަންކަމުގެ ވާހަކަ ސޯސަލް މީޑިއާގައި މުތޫ އަންނަނީ ކޮންމެ ދުވަހަކު ކަހަލަ ގޮތަކަށް ލިޔަމުންނެވެ. މިގޮތުން މި ސަރުކާރުގެ އިސްވެރިން އިންޑިޔާގެ ވެރިންނަށް ހަނގާކޮށް މަލާމަތް ކުރުމުން އޮސްޓްރޭލިޔާގައި ކިޔަވާ އިންޑިއާގެ ދަރިވަރުންގެ ފަރާތުން ދިވެހިންނަށް މަލާމަތް ރައްދުވާ ކަމަށްބުނެ މުތޫ އެކްސްގައި ކުރި މެސެޖަކަށް ޖަވާބުގައި ޑެޕިއުޓީ މިނިސްޓަރު ޝިއުނާ ބުނެފައިވަނީ މީހުން މަލާމާތާއި ފުރައްސާރަ ކުރަނީ އުޅޭ ގޮތުން ކަމަށާއި ރާއްޖެއިން ބޭރަށްގޮސްވެސް އުޅެނީ ރައްޔިތުންގެ މަޖުލިޙުގެ މެމްބަރު ޖާބިރު އުޅޭގޮތަށް ކަމަށެވެ. މީގެ އިތުރުން މުތޫ އަކީ ހަމައިގަ ނުހުންނަ މަސްތުވާތަކެތި ބޭނުންކުރާ މީހެއްކަމަށްވެސް ބުނެފައިވެއެވެ. ޝިއުނާ މި ގޮތަށް ބުނެފައިވަނީ މުއާވިޔަތުގެ ކޮނޑުގައި ގޮނޑިއެއް އަޅައިގެން ހުންނަ ފޮޓޯއެއް ގައެވެ. މި ފޮޓޯ ބޭނުންކޮށްފައިވަނީ ނުކުޅެދޭ މީހުންނަށް ފަސޭހަގޮތްތަކެއް ހެދުމަށް ބޭއްވި ހަރަކާތެއްގައެވެ. ޝިއުނާ އެކަން ސިފަކުރީ ޖާބިރު އުޅޭ ގޮތަށްކަމަށެވެ. މީގެ އިތުރުން މުތޫ ހިނގާގޮތުން އެއީ މަސްތުވެގެން ކަމަށް ބެލެވޭ ގޮތަށް ބުނާއިރު މުތޫ ދަންނަ މީހުން އެކަމުގެ ރައްދުގައި ބުނެފައިވަނީ މުތޫގެ ބަލީގެ ސަބަބުން އެގޮތަށް ހިނގެނީ ކަމަށާއި މިކަން މުތޫ އަމިއްލައަށްވެސް (ސޯސަލް މީޑިއާގެ ޕްރޮފައިލް ތަކުގައި) ބުނެފައިވާ ކަމަށެވެ.
ޝިއުނާގެ ފާޑުކިޔުންތަކާއި މަލާމާތަށް ރައްދު ދެމުން މުތޫ ބުނެފައިވަނީ މި ފަހުން ބައެއް މީހުން މިނިސްޓަރުންވެސް ހިމެނޭހެން ނުކުޅެދޭ މީހުންގެ ހައްގުގައި ވަކާލާތުކުރަން ކުރާ މަސައްކަތަށް އުނިކަން އަންނަ ގޮތަށް ވާހަކަ ދެއްކުމަކީ ވަރަށް ހިތްމަރުވާ ކަމެއް ކަމަށެވެ.
