ސޯސަލް މީޑިއާގެ މަގުބޫލު ޓިކްޓޮކުން ދިވެހިންނަށް އާމްދަނީ ލިބޭނެ ގޮތް ހައްދަވައިދެއްވާނެ ކަމަށް އިކޮނޮމިކް މިނިސްޓަރު ވިދާޅުވުމުން ފާޑުކިއުން އަމާޒު ވެއްޖެއެވެ.
އިކޮނޮމިކް މިނިސްޓަރ މުހައްމަދު ސައީދު ވިދާޅުވީ ވަރަށް އަވަހަށް ޓިކްޓޮކުން އާމްދަނީ ހޯދޭނެ މަގު ދިވެހިންނަށް ހުޅުވިގެންދާނެ ކަމަށެވެ. މީގެ އިތުރުން ޓިކްޓޮކުން ފައިސާ ލިބުމުގައި ހުރި ދަތިތައްވެސް ޗައިނާއާއި މަޝްވަރާކޮށްގެން ހައްލު ކުރަމުން އަންނަ ކަމަށްވެސް ސައީދު ވިދާޅުވިއެވެ. މި ވާހަކައާއި ގުޅިގެން ސޯސަލް މީޑިއާގައި އަންނަނީ ވަރަށް ބޮޑަށް ފާޑުކިޔަމުންނެވެ. މި ގޮތުން އާއްމު މީހަކު ބުނެފައިވަނީ ޗައިނާ ސަރުކާރުން ޓިކްޓޮކްގެ އެއްވެސް ކަމަކާ ނުބެހޭނެ ކަމަށާއި އެމެރިކާގައިވެސް އެންމެ ބޮޑަށް ޓިކްޓޮކް ގެ މައްސަލަ ދިމާވީ ޗައިނާ ސަރުކާރުގެ ކޮންޓްރޯލް އޮންނަ ސޯސަލް މީޑިއާ ޕްލެޓްފޯމެއްގެ ގޮތުގައި ދެކޭތީ ކަމަށެވެ. އެމެރިކާގެ ކޮންގްރެސްގައިވެސް ޓިކްޓޮކް ގެ ސީއީއޯއަށް އެންމެ ބޮޑަށް އަމާޒުވީވެސް ޗައިނާއާއި އޮންނަ ގުޅުމުގެ މައްޗަށެވެ. އެ ސުވާލުގެ ޖަވާބުގައި ޓިކްޓޮކްގެ ސީއީއޯ ތަކުރާރުކޮށް ވިދާޅުވަމުން އައީ ޓިކްޓޮކާއި އަދި ޓިކްޓޮކް ހިންގަމުން އަންނަ ކުންފުންޏާއި ޗައިނާ ސަރުކާރާއި އެއްވެސް ގުޅުމެއް ނެތް ކަމަށެެވެ. އޭނާ އަކީވެސް ސިންގަޕޫރުގެ ރައްޔިތެއް ކަމަށާއި އަދި ޓިކްޓޮކް ހިންގަމުންދަނީ ސިންގަޕޫރުގައި ކަމަށާއި އެތަނުގެ ގާނޫނާއި ގަވައިދަށް އަމަލު ކުރަމުންދާނެ ކަމަށެވެ.
ޓިކްޓޮކުން އާމްދަނީ ހޯދޭނެ ގޮތް ބުނެ ނުދެވޭއިރު މިހާރުވެސް ޓިކްޓޮކްގައި ކޮންޓެންޓު ހަދާ ފަރާތްތަކާއި އަދި އެހެނިހެންވެސް ގޮތް ގޮތުން ޓިކްޓޮކުގައި ހަރަކާތްތެރިވާ ދިވެހިން އަންނަނީ އާމްދަނީ ހޯދަމުންނެވެ. މި ގޮތުން ގޭމު ކުޅެގެންނާއި އަދި ގިފްޓުގެ ގޮތުގައިވެސް ފައިސާ ލިބޭއިރު މި ފައިސާ އަމިއްލަ އެކައުންޓަށް ޖަމާކުރަންވެސް ވަނީ ދަސްކޮށްފައެވެ. ޓިކޮޓޮކުން ލިބޭ އާމްދަނީ ބޭންކު އޮފް މޯލްޑިވްސް ނުވަތަ އިސްލާމިކް ބޭންކު އެކައުންޓަކަށް ޖަމާ ކުރުމަކީ އެއްވެސް އުނދަގޫ ކަމެއް ނޫން ކަމަަށް ޓިކްޓޮކް ބޭނުންކުރާ މީހުން ބުނެއެވެ. މުރާސިލަށް މައުލޫމާތު ދެމުން ޓިކްޓޮކުގައި މިހާރުވެސް ވަރަށް ހަރަކާތްތެރި ފަރާތެއް ބުނީ އޭނާ މިހާރުވެސް މަހު މުސާރައަށްވުރެ ބޮޑު އާމްދަނީއެއް ޓިކްޓޮކުން ހޯދާ ކަމަށެވެ. ޓިކްޓޮކް ނޫނަސް ސޯސަލް މީޑިއާގައި އެހެނިހެން ވަސީލަތްތަކުންވެސް އާމްދަނީ ހޯދޭނެ ކަމަށާއި، ލިބޭނީ އެކަމަށް ވަރަށް ވަގުތު ދެވި، މަސައްކަތްވެސް ކުރެވިގެން ކަމަށްވެސް އޭނާބުންޏެވެ.
