ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ނައިބު ރައީސް ކަމުގެ މަގާމުގައި ހުންނެވި މުހައްމަދު ފިރާޒް އެމަގާމުން ވަކިކޮށްފިއެވެ.
ޕީބީސީން ސޯސަލް މީޑިއާގައި ޝާއިއުކޮށްފައިވާ ކުރު މެސެޖެއްގައި ބުނެފައިވަނީ މި ބޯޑުގެ ނައިބް ރައީސް އަލްފާޟިލް މުހައްމަދު ފިރާޒު 25 ޖުލައި 2024 ވަނަ ދުވަހު ވަނީ މަޤާމުން ވަކިކުރައްވާ ކަމަށާއި ވޭތުވެދިޔަ ކުރު މުއްދަތުގެ ތެރޭގައި މުހައްމަދު ފިރާޒު މި ބޯޑަށް ކޮށްދެއްވި ޚިދުމަތްތަކަށް ޝުކުރު ދަންނަވާ ކަމަށެވެ.
ބައެއް މީޑިއާ ތަކަށް މައުލޫމާތު ދެމުން ޕީބީސީން ބުނެފައިވަނީ އޭނާ މަގާމުން ވަކި ކުރީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އެންގެވުމުގެ މަތިންނެވެ.
ފިރާޒު ޕީބީސީއަށް އައްޔަން ކޮށްފައިވަނީ ރައީސް އިބްރާހިމް މުހައްމަދު ސޯލިހުގެ ވެރިކަމުގައެވެ. ވެރިކަން ބަދަލު ވުމުން ފިރާޒު ވަނީ ވަރަށް ބޮޑަށް ރައީސް ޑރ.މުހައްމަދު މުއިއްޒަށް ތާއިދުކޮށް ސޯސަލް މީޑިއާގައި ޝުއޫރު ފާޅު ކޮށްފައެެވެ. މީގެ އިތުރުން ސަރުކާރު ނިސްބަތްވާ ޕާޓީ ޕީއެންސީގެ ސިޔާސީ ހަރަކާތްތަކުގައިވެސް ޕިރާޒު ހަރަކާތްތެރިވަމުން ދިޔައެވެ. ރައްޔިތުންގެ މަޖުލިސް އިންތިހާބުގައިވެސް ފިރާޒުވަނީ ޕީއެންސީގެ ކެންޑިޑޭޓުންނަށް ތާއިދު ކުރުމަށް އެދި ވަރަށް ބޮޑަށް ކެމްޕޭނުކޮށްފައެވެ. މި މައްސަލަ ވަނީ އޭރުގެ ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް (އެސްއޯއީ) ކޮމިޓީން ބަލާފައެވެ.
ޕީސީބީގެ ރައީސާއި ނައިބު ރައީސަށް ސިޔާސީ ޕާޓީތަކުގައި ރަޖިސްޓްރީވެ ސިޔާސީ ހަރަކާތްތަކުގައި ބައިވެރިއެއް ނުވެވޭނެއެވެ. ނަމަވެސް މި ކަމަށް ޗެލެންޖުކޮށް، ފިރާޒު ވަނީ ޕީއެންސީއަށް ސޮއިކޮށްފައެވެ.
