ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް ޖެއްސި ބައިނަލްއަގުވާމީ މަތިންދާބޯޓެއްގެ ޓަޔަރު ފަޅައިގެން ގޮސްފިއެވެ.
ދުބާއީން ފުރައިގެން ވެލާނާ އިންޓަނޭޝަނަލް އެއާޕޯޓަށް މިއަދު މެންދުރު 14:18 ގައި ޖެއްސި ފްލައި ދުބާއީގެ FZ 1569 ގެ ބޯޓުގެ ޓަޔަރު ފަޅައިގެން ގޮސްފައިވަނީ މަތިންދާބޯޓު ޖެއްސި ވަގުތުއެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވެސް ވަނީ ވެލާނާ އެއާޕޯޓަށް ފްލައިޓެއް ޖެއްސި ވަގުތު ޓަޔަރު ފަޅައިގެން ދިޔަކަން ކަށަވަރު ކޮށްދީފައެވެ.
އެމްއޭސީއެލުން ބުނީ، މިހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށެވެ.
”ފަސިންޖަރުންނާއި ކްރޫއިން ތިބީ ސަލާމަތުން،“ އެ ކުންފުނިން ޓްވީޓްކޮށްފައިވެ އެވެ.
މިހާދިސާއާއި ގުޅިގެން މިވަގުތު ރަންވޭ ބަންދު ކޮށްފައިވާއިރު، ހަވީރު 17:00 ގެ ފަހުން ރަންވޭ ހުޅުވުމުގެ މަސައްކަތް ކުރަމުން އަންނަ ކަމަށް ވެސް އެމްއޭސީއެލުން ވަނީ ބުނެފައެވެ.
ވެލާނާ އިންޓަނޭޝަލް އެއާޕޯޓުގެ ރަންވޭ ބަންދު ކުރުމާއި ގުޅިގެން ކޮލަމްބޯ، ބެންގަލޫރު، ކޫއްޑޫ، ދުބާއީ، އިފުރު/ހަނިމާދޫ ފްލައިޓްތައް ވަނީ ޑައިވާޓް ކޮށްފައެވެ.
