ރައްޔިތުން މަޖުލީހުގެ މެމްބަރުންނާއި މާރާމާރީ ހިންގައި މަޖުލީހުގެ ތަކެއްޗަށް ގެއްލުން ދިނީ މެމްބަރު މަސްތުގެ ހާލަތުގައި ހުރެގެން ކަމަށް ތުހުމަތުކޮށްފިއެވެ. ކަނޑިތީމުގެ ދާއިރާގެ މެމްބަރު ޝަހީމަށް ނިސްބަތްކޮށް އެގޮތަށް ތުހުމަތުކޮށްފައިވަނި މިއަދު މިނިސްޓަރުންނަށް ރުހުން ދިނުމުގެ މައްސަލާގައި ރައްޔިތުން މަޖުލީހުގެ ޖަލްސާ ހުއްޓުވުމަށް، ޝަހީމު އަމަލުކުރެއްވި ގޮތާއި މަޖުލީހުގައި އުޅުއްވިގޮތުގެ ވީޑިއޯތައް ދައުރުވުމުން އެކަމަށް ރިޔާއަތްކޮށެވެ. މެމްބަރު ޝަހީމު ވަނީ މަޖުލީހުގެ ރިޔާސަތު ގޮނޑީގައި އިށީންދެ މަޖުލީހުގެ ރައީސްގެ ބައެއް ތަކެއްޗަށ ގެއްލުންދީފައެވެ. މީގެ އިތުރުން ބައެއް މެމްބަރުންނާއި އޮޅުލައި ބައްދައި، މެމްބަރުންނަށް ހަމަލާދޭން ދުވެފައިދާ މަންަޒަރު ފެންނަ ވީޑިއޯއެއްވެސް ވަނީ ދައުރުވެފައެވެ. ބައެއް އާއްމު ރައްޔިތުންވެސް އެ ވީޑިއޯތަކަށް ކޮމެންޓުކޮށް ބުނެފައިވަނީ މިއަދު ގެ ޖަލްސާގައި ޝަހީމުގެ އުޅުއްވުން ހީވަނީ މީގެ ކުރިން މަޖުލީހުގައި ޖާބިރު އުޅޭ ގޮތަށް ކަމަށާއި ’ހަމައިގައި‘ ހުންނެވި ކަމަށް ގަބޫލު ނުކުރެވޭ ކަމަށެވެ. ރައްޔިތުން މަޖުލީހުގެ ބައެއް މެމްބަރުންވެސް ވަނީ ޝަހީމު މިއަދު ހުންނެވީ މަސްތުގެ ހާލަތުގައި ކަމަށާއި، ވާނުވާގައި ޝަހީމު އުޅުއްވި ގޮތުން ސަރުކާރުވެސް ލަދުގަންނަން ޖެހޭނެ ކަމަށެވެ. ޝަހީމު މިހާރު ނިސްބަތްވަނީ ސަރުކާރު ހިންގާ ޕާޓީ ޕީއެންސީއަށެވެ.
މެމްބަރު ޝަހީމަކީ ކުރިން އެމްޑީޕީގެ އެކްޓިވިސްޓެއްގެ އިތުރުން އެ ޕާޓީގެ ޓިކެޓުގައި މަޖުލީހަށް ހޮވުމަށް ފަހު، ޕީއެންސީއަށް ސޮއިކޮށްފައިވަނީ ދާދި ފަހުންނެވެ. އދ.ދިގުރަށުގައި ’އަންވިންޑު‘ ގެ ނަމުގައި ފުޅާދާއިރާގައި ގެސްޓުހައުސްގެ ވިޔަފާރި ހިންގަވާ ޝަހީމު ކުރިއަށް އޮތް މަޖުލީހުގެ އިންތިހާބުގައި ވާދައެއް ނުކުރެއެވެ.
ޝަހީމު މިއަދު އުޅުއްވި ގޮތިން ގިނަ އަދަދެއްގެ އާއްމު ރައްޔިތުން އަންނަނީ ފާޑުކިޔަމުންނެވެ. ހާއްސަކޮށް މަޖުލިސް މެމްބަރެއްގެ އަމަލުތައް ހައްދު ފަހަނައަޅާ ދާން ނުޖެހޭ ވަރަށް ޝަހީމުގެ އަމަލުތައް ހުރި ކަމަށްބުނެ އަންނަނީ ފާޑުކިޔަމުންނެވެ.
