މިދިޔަ ހަފުތާގައި ރާއްޖެ އައި ޕާކިސްތާން މީހެއް ދެ މިލިއަން ރުފިޔާގެ މަސްތުވާތަކެތި އެތެރެ ކުރަން މަސައްކަތް ކޮށްފިއެވެ.
މިއަދު ފުލުހުންނާއި ކަސްޓަމްސްއިން ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި ސުޕްރިންޓެންޑެންޓް މުހައްމަދު އަފްޒަލް ވިދާޅުވީ މަސްތުވާތަކެތި ފެނުނީ މިދިޔަ ބުދަ ދުވަހު އައި ޕާކިސްތާނުގެ ފަސިންޖަރެއްގެ ތަކެތިން ކަމަށެވެ. އެ ތަކެތީގެ ފުރަތަމަ މަރުހަލާގެ ޓެސްޓުތަކުން ހެރޮއިންއަށް ޕޮޒިޓިވްވެފައިވާ ކަމަށް އޭނާ ވިދާޅުވިއެވެ.
ޖުމްލަ ބަރުދަނުގައި 2.12 ކިލޯގްރާމް ހުރި މަސްތުވާތަކެއްޗާއެކު އޭނާ ރާއްޖެ އައިސްފައިވަނީ އަބޫދާބީ މަގުންނެވެ. ފުލުހުން މައުލޫމާތުދޭ ގޮތުގައި މި ތަކެތީގެ މަގުމަތީގެ އަގަކީ ގާތްގަނޑަކަށް 2،120،000ރ އެވެ.
މީގެ އިތުރުން މި މައްސަލައާ ގުޅުން ހުރި ކަމަށް ތުހުމަތު ކުރެވޭ ދެ ދިވެހިން މިހާތަނަށް ވަނީ ހައްޔަރުކޮށްފައެވެ. އެއީ އުމުރުން 25 އަހަރާއި 40 އަހަރުގެ ދެ ފިރިހެނުންނެވެ. އެ ދެ މީހުން ވެސް ކޯޓުން 15 ދުވަހުގެ ބަންދު މުއްދަތު ޖަހައިފައިވާ ކަމަށް ފުލުހުން މައުލޫމާތު ދެއެވެ. އަދި ޕާކިސްތާނުގެ މީހާއަށް ވެސް ވަނީ ކޯޓުން 15 ދުވަހުގެ ބަންދުގެ މުއްދަތު ޖަހާފައެވެ.
ފުލުހުން މައުލޫމާތު ދޭ ގޮތުގައި މިހާތަނަށް ހައްޔަރުކޮށްފައިވާ ދެ ދިވެހިންނަކީ ވެސް ކުށުގެ ރެކޯޑު އޮތް މީހުން ކަމަށާއި އެ މައްސަލައާ ގުޅުން ހުރި އިތުރު ބަޔެއްގެ ތަހުގީގު ވެސް ކުރިއަށްގެންދާ ކަމަށެވެ. ނަމަވެސް މިހާރު ވެސް ތަހުގީގު ކުރިއަށްދާތީ އެ މީހުންނާ ގުޅޭ އިތުރު މައުލޫމާތު ފަހުން ހާމަކުރާނެ ކަމަށްވެސް ފުލުހުން މައުލޫމާތު ދެއެވެ.
