ސަރުކާރުގެ މަސް ކުންފުނި މިފްކޯއިން މަސް ގަންނަ އަގު ދަށް ކުރުމުގެ މަސައްކަތް ފަށައިފިއެވެ.
ރައްޔިތުން މަޖުލީހުގެ މާލިއްޔަތު ކޮމެޓީއަށް މައުލޫމާތު ދެއްވަމުން ފިނޭންސް މިނިސްޓަރުވެސް ވަނީ އެކަން ޔަގީންކޮށްދެއްވާފައެވެ. މިނިސްޓަރު ވިދާޅުވީ މިހާރުވެސް ގެއްލުމުގައި ހިންގަމުންދާ މިފްކޯއިން ފައިދާވާ ކުންފުންޏެއްގެ ގޮތުގައި ހިންގޭނީ މަސް ގަންނަ އަގު ދަށްކޮންގެންނެވެ. މަސްވެރިންނަށް ފައިސާ ދިނުމުގައި ދަތިތަކެއް ދިމާވަނީވެސް މަހުގެ އަގު ގެއްލުމުގައި ގަތުމުން ކަމަށާއި މިފްކޯގެ ގެއްލުމުގެ ބަދަލު ސަރުކާރުން ދޭން ޖެހުމުގެ ސަބަބުން ދައުލަތަށްވެސް އެކަން ބުރައަކަށްވާ ކަމަށެވެ.
މިއަހަރުގެ ބަޖެޓުގައިވެސް 415 މިލިއަން ރުފިޔާ ސަބްސިޑީގެ ގޮތުގައި މިފްކޯއަށް ދިނުމަށް ދައުލަތުންވަނީ ނިންމާފައެވެ. މީގެ ތެރެއިން 270 މިލިއަން ރުފިޔާ ވަނީ މިފްކޯއަށް ދޫކޮށްފައެވެ.
މަސްވެރިންނަށް ދޭން ޖެހޭ ފައިސާ ނުދިނުމުގެ ސަބަބުން މިހާރުވެސް އައްޑޫ މަސްވެރިން މުޒާހަރާ ކުރަމުންދާއިރު މި މަހުގެ ކުރީކޮޅު މާލޭ ފަޅުތެރޭގައިވެސް މަސްވެރިންވަނީ މުޒާހަރާ ކޮށްފައެވެ.
މިފްކޯއިން ބުނަނީ މަސްވެރިންއަތުން މަސް ގަންނަމުންދަނީ ގެއްލުމުގައި ކަމަށާއި މަހުގެ އަގު ދަށްކޮށްގެން ނޫނީ ގަވައިދުން މަސްވެރިންނަށް ފައިސާ ނުދެވޭނެ ކަމަށެވެ. މަހުގެ އަގު ދަށް ކުރަނީ ކިހާ ވަރަކަށް ކަމެއް މިހާތަނަށް މިފްކޯއިން އަދި ސަރުކާރުންވެސް ހާމައެއް ނުކުރެއެވެ.
