މިއަދަކީ މާތް ވެގެންވާ ހައްޖު ދުވަހެވެ. ދުނިޔޭގެ އެކި ކަންކޮޅު ތަކުން ސައުދީ އަރަބިއްޔާގެ މައްކާއާށް އައިސް އަރަފާތ ބިމުގައި ތިބޭ ދުވަހަކީ މިއަދެވެ. ދުނިޔޭގެ 160 ގައުމަކުން 2 މިލިއަނަަށްވުރެ ގިނަ ހައްޖާޖީން މިއަހަރު ހައްޖު އަޅުކަމުގައި ބައިވެރިވެވުނަސް އެންމެ ހިތްދަތި ކަމެއް ލިބުނީ ސޫދާނުގެ ރައްޔިތުންނަށެވެ. މުސްލިމުންގެ އާބާދީ ބޮޑު ސޫދާނުގެ ދާހިލީ ހަނގުރާމައިގެ ސަބަބުން ހައްޖުގެ އަޅުކަމަށް އަންނަން ބޭނުން ގިނަ ބަޔަކަށް ނާދެވުނެވެ.
މީގެ އެތައް އަހަރެއް ކުރިން ހައްޖުގެ އަޅުކަމަށް ތައްޔާރުވި މީހުންވެސް ސޫދާނުގައި މަޑުކުރަން ޖެހިފައިވަނީ ހަނގުރާމައިގެ ބިރުވެރިކަމާ ބައިނަލް އަގުވާމީ ދަތުރުފަތުރުގެ ގާތް ގަނޑަކަށް ހުއްޓިފައިވާތީއެވެ.
މި ފަހަރު ސޫދާނުން ހައްޖުގެ އަޅުކަމަށް އާދެވުނީ ނިސްބަތުން ވަރަށް މަދު އަދަދެއްގެ ބަޔަކަށެވެ. އޭގެ ތެރޭގައި ހިމެނެނީ ތަނަވަސް މީހުންނާއި ހަނގުރާމަ ހިނގަމުންދާ ހިސާބުތަކާ ދުރުގައި އުޅޭ މީހުންނާއި އަދި ދަތި އުނދަގުލުން ކޮންމެވެސް ގޮތަކުން މައްކާއާ ހަމައަށް އާދެވިފައި ތިބި މީހުންނެވެ.
އޮގަނައިޒޭޝަން އޮފް އިސްލާމިކް ސޮސައިޓީން ވަނީ ހައްޖު ދުވަހަށާއި އީދު ދުވަހަށް ދެފަރާތުން ހަމަލާ ބަދަލުކޮށް، ސޫދާނުގެ ރައްޔިތުންނަށް އީދު އުފާވެރިކަމުގެ ވަގުތު ކޮޅެއް ދިނުމަށެވެ. ނަމަވެސް ސިޔާސީ ބާރުވެރިކަން ހޯދުމަށް ހަނގުރާމަ ކުރަމުންދާ ދެ ލީޑަރުންނާ އެމީހުންގެ އަވައިގަ ޖެހިފަ ތިބި ހަނގުރާމަވެރިން ތިބީ ދޫދޭ ގޮތަކަށް ނޫނެވެ.
ހިތާމައަކީ މި ކަހަލަ ސިޔާސީ ބާރުވެރިކަން ހޯދުމަށް ގައުމު ސުންނާފަތި ކުރަމުންދާ ސިޔާސީ ލީޑަރުން ފަހަތަށް ބައެއް ރައްޔިތުން އަރާ، އެމީހުންނަށް މި ފަދަ އަނިޔާވެރިކަން އިސްކުރަން ފުރުސަތު ދޭތީއެވެ.
