މިލަންދޫގައި އެއާޕޯޓެއް އަޅާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވައިފިއެވެ. ރައީސުލްޖުމްހޫރިއްޔާ މިހެން ވިދާޅުވީ މިއަދު ށ. މިލަންދޫ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް ވިދާޅުވީ އެމަނިކުފާނު ވަޢުދުވެވަޑައިގެންނެވި ހުރިހާކަމެއް ފުރިހަމަކޮށްދެއްވާނެކަމުގައެވެ. އޭގެ ތެރޭގައި އިސްލާމީ މަރުކަޒެއް އެޅުމުގެ މަސައްކަތް މިނިސްޓްރީ އޮފް އިސްލާމިކް އެފެއާޒް އިން ކުރިއަށް ގެންދަވާކަމަށާއި އަދި މަގުތައް ހެދުމާއި ހޮސްޕިޓަލްގެ މަސައްކަތާއި، އިންޑޯ އައުޓްޑޯ ކުޅިވަރު ކުޅޭ ކޮމްޕްލެކްސް ހެދުމާއި، މީގެ އިތުރުން ހައުސިންގ ދާއިރާއިން ހުރި ވަޢުދުތައް ހިމެނޭހެން ހުރިހާ ވަޢުދުތައް ފުއްދަވާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވިއެވެ.
ރައީސްއަށް މަރުހަބާ ދެންނެވުމަށް އެރަށުގައި އެއްވެ ތިބި ކުޑަކުދިން ތިބީ އެއަރޕޯޓެއްގެ ތަސްވީރެއް ހިފައިގެންނެވެ. މިލަންދޫގައި ރައްޔިތުންގެ މަޖުލީހުގެ ކެމްޕޭނު ކުރަމުންދަނީވެސް އެއަރޕޯޓު ލިބޭނީ ސަރުކާރަށް މަޖުލިސް ގޮނޑީ ދީގެން ކަމަށް ބުނެ އެ ޝިޔާރުގެ ދަށުންނެވެ.
މިލަންދޫގައި އެއަރޕޯޓެއް އަޅާއިރު އެރަށާއި ވިއްސަކަށް މިނިޓުން ދެވޭ ހިސާބުގައި ފުނަދޫގައި އަންނަނީ އެއަރޕޯޓެއް ހަދަމުންނެވެ. މީގެ އިތުރުން ރައީސް އިބްރާހިމް މުހައްމަދު ސޯލިހުގެ ވެރިކަމުގައި މިއަތޮޅު ބިލެތްފަހީގައި އެއަރޕޯޓެއް އެޅުމަށް ވަނި ހަވާލުކޮށްފައެވެ. މީގެ އިތުރުން ރައީސް ޑރ.މުއިއްޒުގެ ރިޔާސީ ވައުދުގެ ތެރޭގައި ށ.ކޮމަންޑޫގައިވެސް އެއަރޕޯޓެއް އަޅުއްވައިދެއްވާނެ ކަމަށްވަނީ ވައުދުވެފައެވެ.
