ޕީޕީއެމް ޕީއެންސީ މަޖުލިސް ޕްރައިމަރީގައި މިއަދުވެސް އެންމެ ބޮޑަށް މައްސަލަ ދިމާވި އެއްދާއިރާ ކަމަށްވާ މެދު ހެންވޭރު ދާއިރާގެ ވޯޓު ފޮށި ފަޅާލައި، ވޯޓު ކަރުދާސްތައް އުކާލައިފިއެވެ.
ވޯޓުލުން ބަންދުވެ، ވޯޓު ގުނަން ތައްޔާރުވި ވަގުތު މި ހަމަނުޖެހުން ހިނގީ ވޯޓު ލިސްޓުގައި ނަން ނެތް އެތައް ބަޔަކު ވޯޓުލުމާއި އަދި ރެއާ ހަމައަށް ވޯޓާސް ލިސްޓުގައި ނަން އޮތް ބައެއް ފަރާތްތައް އުނިކުރުމުން އުފެދުނު ހަމަ ނުޖެހުމުގައެވެ. މި ގޮތުން ވޯޓު ފޮއްޓަށްލާފައިވާ ހުރިހާ ވޯޓު ކަރުދާހެއް ވަނި ބިންމައްޗަށް އުކާލާފައެވެ. މި ހަމަ ނުޖެހުން ކޮންޓްރޯލު ކުރުމަށް ފުލުހުންގެ އެސްއޯ ޓީމެއް މިހާރު އަންނަނީ ކަލާފާނު ސްކޫލާއި އެ ސަރަަހައްދުގައި ހަރަކާތްތެރިވަމުންނެވެ.
މީގެ އިތުރުން މިއަދު ވޯޓު ލުމުގައި ހުޅުމާލެ ދެކުނު ދާއިރާގެ ވޯޓުލާ ސަރަހައްދުފައި ހަމަނުޖެހުން ހިނގާފައެެވެ. އެ ދާއިރާގެ އެއް ކެންޑިޑޭޓު ދުންޔާ މައުމޫން ސޯސަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނި އެ މައްސަލަ ހައްލު ކޮށްދެއްވުމަށް ޕީޕީއެމް ޕީއެންސީގެ ވެރިންނަށް އިލްތިމާސް ކުރައްވާފައެވެ.
