ލޯކަލް ގަވަމަންޓް އޮތޯރިޓީ (އެލްޖީއޭ)ގެ ސީއީއޯއަކަށް ޑރ. މަރިޔަމް ޒުލްފާ މިއަދު އައްޔަންކޮށްފިއެވެ.
އެ މަގާމަށް މިއަދު ރައީސް ޑރ. މުހައްމަދު މުއިއްޒު، ޒުލްފާ އައްޔަން ކުރައްވާފައި މިވަނީ އެ މަގާމު ހުސްވެފައި އޮންނަތާ ހަތް މަހަށްވުރެ ގިނަ ދުވަސްވީ ފަހުންނެވެ. އެލްޖީއޭގެ ސީއީއޯގެ މަގާމު ހުސްވީ މީގެ ކުރިން އެ މަގާމުގައި ހުންނެވި އަފްޝަން ލަތީފް މިދިޔަ މެއި މަހުގެ 15 ގައި އިސްތިއުފާ ދެއްވުމުންނެވެ. ރައީސް ސޯލިހުގެ ވެރިކަމުގައި އެލްޖީއޭގެ ސީއީއޯގެ މަގާމުން އަފްޝަން އިސްތިއުފާދެއްވީ ރައީސް ނަޝީދު އިސްވެ ހުންނަވައި އުފެއްދެވި ޑިމޮކްރެޓްސް ޕާޓީއަށް ސޮއިކުރެއްވުމަށްފަހު އެވެ.
ޒުލްފާއަކީ އެމްޑީޕީގެ ފުރަތަމަ ވެރިކަމުގައި ކުރީގެ ރައީސް މުހައްމަދު ނަޝީދުގެ ސަރުކާރުގެ ޓޫރިޒަމް މިނިސްޓަރު ކަން ކުރެއްވި ބޭފުޅެކެވެ. ހަތެއް ފެބުރުއަރީގައި ރައްޔިތުންގެ ފަރާތުން ކުރިމަތިވެވަޑައިގެންނެވި ޕްރެޝަރުތަކުގެ ސަބަބުން ރައީސް ނަޝީދާ އެކު އެމަނިކުފާނުގެ މުޅި ކެބިނެޓް އިސްތިއުފާ ދެއްވުމަށްފަހު، ރާއްޖެ ދޫކުރައްވައި ޒުލްފާ ރާއްޖޭން ބޭރަށް ދިރިއުޅުން ބަދަލުކުރެއްވިއެވެ.
ރިޔާސީ އިންތިހާބުގައި ޒުލްފާ ވަނީ ރައީސް ޑރ.މުހައްމަދު މުއިއްޒުގެ ކެމްޕޭނުގައި ހަރަކާތްތެރިވެފައެވެ. ޒުލްފާ މިހާރު އުޅުއްވަނީ މާލެސިޓީގެ މޭޔަރުގެ މަގާމަށް ކުރިމަތިލާފައިވާ ޕީއެންސީގެ ކެންޑިޑޭޓު އާޒިމާ ޝުކޫރުގެ ކެމްޕޭނު ހަރަކާތްތަކުގައެވެ.
