މީގެ ހަފްތާއެއް ކުރިން ގެއްލިގެން ހޯދަމުންދިޔަ ހދ. މަކުނުދޫ / ސިތާރާމަންޒިލް، ނާޠިފް ޢަބްދުއްސަލާމް ރޭގެ ވަގުތެއްގައި މާލެއިންވަނީ ފެނިފައިވާ ކަމަށާއި ހާލު ރަނގަޅުކަމަށް ޕޮލހުން ބުނެފިއެވެ.
މިދިޔަ ހަފުތާގެ އާދިއްތަ ދުވަހު ފުލުހުންނަށް ލިބުނު ރިޕޯޓަކާ ގުޅިގެން ހޯދަމުން ދިޔައީ ހދ. މަކުނުދޫ، ސިތާރާމަންޒިލް، ނާޠިފް ޢަބްދުއްސަލާމް އެވެ. އޭނާ ހޯދުމުގެ މަސައްކަތް ކުރަމުންދާކަން ފުލުހުން އިއުލާންކުރީ މިދިޔަ އަންގާރަ ދުވަހުއެވެ.
ފުލުހުން މީގެ ކުރިން އާންމުކުރި މައުލޫމާތުގައިވާ ގޮތުން 28 އަހަރުގެ އެ މީހާ މިހާރު ދިރިއުޅެނީ މާލޭގައެވެ. އަދި އޭނާ އެންމެ ފަހުން ފެނިފައި ވަނީ މިމަހުގެ 15އިގައެވެ.
މި މަސް ތެރޭގައި މާލޭ ސަރަހައްދުން ތިން މީހަކު ގެއްލިގެން ހޯދަން އިއުލާންކޮށްފައިވެއެވެ. އެ ތިން މީހުން ވެސް ގެއްލިފައިވާ ކަމަށް ފުލުހުން އިއުލާންކުރިތާ މާގިނަ އިރުތަކެއް ނުވެ ވަނީ ފެނިފައެވެ. މިގޮތަށް ގެއްލިގެން ހޯދަމުންދާ މީހުން ގެ ހަބަރެއް ވުމުން، އެމީހުން ފެނުނު ވާހަކަ ފިޔަވައި އިތުރު ތަފްސީލެއް ނުލިބޭތީ އާއްމުން މި ކަމުގެ ކަންބޮޑުވުން ފާހަގަކުރެއެވެ. ގިނަ ފަހަރަށް އިތުރު ތަފްސީލެއް ނުދެނީ އާއިލާއިން އެކަން އެގޮތަށް ބޭނުންވާތީ ކަމަށްވެއެވެ.
