ދިވެހި ސަރުކާރުން ދީފައިވާ ލަފަޔާއި ހިލާފަށް ކާޑު ލިމިޓު އުވާލުމުން އުފެދުނު ނުތަނަވަސްކަމުގެ ތެރެއިން ގާނޫނީ ގޮތުން އުފެދިފައިވާ ސަރުކާރު ވައްޓާލަން މަސައްކަތް ކުރި ކަމަށް ބުނެ މޯލްޑިވްސް ޕޮލިސް ސަވިސްއިން ތަހުގީގެއް ފަށައިފިއެވެ. ޕޮލިހުން މިރޭ ނެރުނު ކުއްލި ބަޔާނެއްގައި ބުނެފައިވަނީ ބެންކު އޮފް މޯލްޑިވްސްއިން، ސަރުކާރުގެ މައި ހިއްސާ އޮންނަ ބޭންކަކުން ސަރުކާރުގެ މަޝްވަރާއާ ޚިލާފަށް ދިވެހި ގިނަ ރައްޔިތުންނަށް ކުއްލި ސިހުމެއް ލިބޭ ފަދަ ނިންމުމެއް ނިންމި ވަގުތާ ދިމާކޮށް ސިޔާސީ ފަރާތްތަކުން ސަރުކާރުގެ މާލީ ހާލަތާ ބެހޭ ގޮތުން ނޫސްވެރިންގެ ބައްދަލުވުމެއް ބޭއްވި ކަމަށެވެ.
އެ ބައްދަލުވުން ބޭއްވި އެވަގުތު ސޯޝަލް މީޑިއާ އެތައް ސަތޭކަ ބޮޓް އެކައުންޓް ބޭނުންކޮށް ސަރުކާރު ވައްޓާލަން މަގުތަކަށް ނުކުތުމަށާއު އާންމު ހަމަޖެހުން ނަގާލުމަށް ގޮވައި، ގައުމުގެ މަސްލަހަތު ނަގާލުމަށް ހިތްވަރުދީ ހަދައިފައިވާތީ، އެކަމަކީ ގާނޫނީ ސަރުކާރެއް ޣައިރު ގާނޫނީކޮށް ބަދަލުކޮށްލުމަށް ކުރި ކަމެއް ކަމަށް ބެލުމުގެ ޖާގަ އޮތް ކަމަށް ބަޔާނުގައިވެއެވެ.
އެހެންވެ، އެ މައްސަލަ ފުލުހުންގެ ފަރާތުން ތަހުގީގުކުރަން ފެށީ ކަމަށް ބަޔާނުގައިވެއެވެ.
ބެންކުން ނިންމި ނިންމުމަށް ތާއިދުކޮށް ވެރިކަންކުރާ ޕީއެންސީގެ ސިޔާސީ އެކްޓިވިސްޓުން ސޯސަލް މީޑިއާގައި ފުރަތަމަ ވާހަކަ ދެއްކިޔަސް އޭގެ ފަހުން ވަނީ ބެންކުގެ ވެރިންނަށް އިސްތިއުފާއަށް ގޮވާފައެވެ. ’ނެތް ޑޮލަރެއް ނުދެވޭނެ ކަމަށް ބުނެ‘ ވާހަކަ ދެއްކި ސަރުކާރުގެ އިސްވެރިންގެ ރާގު ބަދަލުވީ ރައީސް އޮފީހުގައި މިނިސްޓަރުން ބޭއްވެވި ޕްރެސް ކޮންފަރެންސަށް ފަހުގައެވެ. އޭގެ ފަހުން ޕީއެންސީއާއި ސަރުކާރުގެ އިސްވެރިންވެސް ތުހުމަތު ކުރަމުންއައީ ބެންކު އޮފް މޯލްޑިވްސް މެދުވެރިކޮށް ބަގާވާތެއް ގެންނަން މަސައްކަތް ކުރި ކަމަށް ތުހުމަތުކޮށްފައެވެ.
