ހޮޅުދޫގައި މުއިއްޒު އިތުރުފުޅު ހެއްދެވި މައްސަލާގައި ރައްޔިތުންގެ ނުރުހުން

ޕީއެންސީގެ ރިޔާސީ ކެންޑިޑޭޓް ޑރ. މުއިއްޒުގެ ރިޔާސީ ކެމްޕޭނުގައި ނ.ހޮޅުދޫ ރައްޔިތުންނާ މުހާތަބުކޮށް ދެއްކި ބައެއް ވާހަކަތަކަކީ ކަނޑައެޅިގެން ދޮގެއް ކަމަށާއި އެކަމުގެ ފުރިހަމަ މައުލޫމާތު އޮޅުވާލުމުގެ ނިޔަތުގައި ދެއްކި ވާހަކައެއް ކަމަށް ހޮޅުދޫގެ ބައެއް ފަރާތްތަކުން ހާމަކޮށްފިއެވެ. މި ގޮތުން ހޮޅުދޫގެ މަގުހެދުމާއި ނަރުދަމާއާއި އަދި ހޮޅުދޫގެ ބައެއްގެ ގޮތުގައި ހަމަޖައްސާދީފައިވާ ފަޅުރަށް މީދޫ އާ ބެހޭ ގޮތުންވެސް މުއިއްޒުވަނީ ދޮގު މައުލޫމާތު ދީފައެވެ. މުއިއްޒުގެ ވާހަކައިގައި ހޮޅުދޫގެ ބައެއްގެ ގޮތުގައި މީދޫ ހަމަޖެއްސީ ޕީޕީއެމްގެ ވެރިކަމުގައި ކަމަށާއި ހޮޅުދޫގައި ފެނާ ނަރުދަމާ ގެ މަސައްކަތް ފެށިފައިނުވާތި އެކަމާ ސަރުކާރުން ލަދުވެތިވާން ޖެހޭނެ ކަމަށެވެ.

މި ވާހަކަތައް ރައްދު ދެމުން ހޮޅުދޫ ކައުންސިލުގެ ކުރީގެ ރައީސް މުހައްމަދު ނަސީރު ވިދާޅުވީ ހޮޅުދޫ ގެ އަވަށެއްގެ ގޮތުގައި ނ. މީދޫ އެންމެ ފުރަތަމަ ލިޔުން ދީފައިވާނީ ރައީސް މައުމޫންގެ ވެރިކަމުގައި 2002 ވަނަ އަހަރުގައެވެ. އެއަށްފަހު 2012 ވަނަ އަހަރު މީދޫ އަކީ ހޮޅުދޫގެ އަވަށެއްގެ ގޮތުގައި ޤާނޫނީ ގޮތުން ހަމަޖެއްސެވީ ޑރ. ވަޙީދު ވެރިކަމުގައެވެ. އެއަށްފަހު 2020 ވަނަ އަހަރު ލާމަރުކަޒީ ޤާނޫނަށްގެނެވުނު ބަދަލާއިއެކު 700 މީޓަރަށްވުރެ ހޮޅުދޫއާއި ދުރުގައި މީދޫ އޮތުމުން މީދޫ ވަނީ ހޮޅުދޫ އިޙްތިސޯސްގައި ނުހިމެނިއެވެ. އޭގެ ފަހުން އަނެއްކާވެސް މީދޫ ހޮޅުދޫގެ އިހްތިސޯސް ތެރެއަށް ހިމަނުއްވާ ހޮޅުދޫ(ހޮޅުމީދޫ)ގެ ނަމުގައި ލިޔުއްވާ އެ ބަދަލު ގެނެސްދެއްވީ ހިނގަމުންމިދާ ވެރިކަމުގައި 2020 ވަނަ އަހަރު ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހެވެ. ނަސީރު ވިދާޅުވީ ރިޔާސީ ކެންޑިޑޭޓަކަށްވެ ހުރެ މިވަރުގެ ބޮޑެތި ދޮފުހަދަން ހެޔޮނުވާނެކަމަށެވެ.

މުއިއްޒުގެ ވާހަކަ ކުށްވެރިކޮށް ހޮޅުދޫން ވާހަކަދެއްކި އެހެން ބޭފުޅަކު ފާހަގަކުރެއްވީ ފެނާ ނަރުދަމާގެ ވާހަކައެވެ. މި ގޮތުން ޕީޕީއެމް ވެރިކަމެއްގައިހޮޅުދޫއިން އެތައް ފަހަރަކު މެޖޯރިޓީ ވޯޓު ހޯދައިގެންވެސް އެ ވެރިކަމުގައި ފެނާ ނަރުދަމާގެ އެއްވެސް މަސައްކަތެއް ނުކުރާ ކަމަށެވެ. އަދި އެކަމުގެ ތަސައްވުރެއްވެސް ގެންގުޅެފައިނުވެއެވެ. މި ސަރުކާރުން ހޮޅުދޫގެ ފެނާ ނަރުދަމާގެ މަސައްކަތް މިހާރުވެސް ކުރަމުންދާ ކަމަށާއި، މި މަސައްކަތުގެ %80 ވަނީ ނިމިފައެއެވެ. ކުރިއަށްއޮތް ދެ މަސް ދުވަހުގެ ތެރޭގައި ހޮޅުދޫގެ ހުރިހާ ގެއަކަށް ހިދުމަތް ފުރިހަމަ ކުރުމަށް ފަހު ދެވޭނެ ކަމަށެވެ. މަގު ހެދުމުގެ މަސައްކަތްވެސް ކުރަމުންދާ ކަމަށާއި، ހަދަމުންދާ މަގު ހުރަސްކޮށް، ޖަލްސާއަށް ގޮއްސަ މުއިއްޒު ބުނަނީ ހޮޅުދޫގައި ތަރައްގީގެ އެއްވެސް މަސައްކަތެއް ނުހިނގާ ކަމަށެވެ.

މުއިއްޒުގެ ކެމްޕޭނުގައި ބައެއް ރަށްރަށަށް ވައުދުވާއިރު އެ ރަށުގައި ނިމިފައި ހުންނަ ކަންތައްތަކުގެ ވައުދާއި ހިނގަމުންދާ މަސައްކަތްތަކުގެ ވައުދުވެސް ވާތީ ބައެއް ފަރާތްތަކުން މުއިއްޒާއި އެމަނިކުފާނުގެ ޓީމަށް ފާޑުކިޔުންދަނީ އަމާޒުވަމުންނެވެ.