ރައީސް ޑރ.މުހައްމަދު މުއިއްޒަށް ސިހުރު ހެދި ކަމުގެ ތުހުމަތުގައި އެންވަޔަރަމަންޓު މިނިސްޓްރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް ހައްޔަރުކޮށްފިއެވެ.
’މުރާސިލަށް‘ މައުލޫމާތު ލިބިފައިވާ ގޮތުގައި މި ފަހުން ޝަމްނާޒް ހައްޔަރުކޮށް ކޯޓަށް ހާޒިރުކުރުމުން އޭނާގެ ބަންދަށް ވަނީ ހަތް ދުވަސް ޖަހައިފައެވެ. ޝަމްނާޒުގެ މައްޗަށް ކުރެވެނީ ރައީސް ޑރ.މުއިއްޒަށް ސިހުރު ހެދި ކަމުގެ ތުހުމަތެވެ. ޝަމްނާޒު ސިހުރު ހެދި މަގުސަދަކީ ރައީސްގެ ވަރަށް އަރިސް ’ގާތް މީހަކަށް‘ ވެވޭތޯ ހެދި ސިހުރެއް ކަމަށްވެއެވެ.
މި މައްސަލާގައި ޝަމްނާޒްއާއި އިތުރު ދެ މީހެއް ހިމެނޭ ގޮތުން ފުލުހުން ދަނީ މައްސަލައެއް ތަހުގީގު ކުރަމުން ކަމަށެވެ.
ޝަމްނާޒް އަކީ ރައީސް އޮފީހުގެ މިނިސްޓަރު އާދަމް ރަމީޒުގެ ކުރީގެ އަނބިކަނބަލުންނެވެ. ރައީސް ޑރ.މުއިއްޒުގެ ވަރަށް އަރިހުގައި ކުރިން މަސައްކަތް ކުރެއްވި އާދަމް ރަމީޒާއި ޝަމްނާޒު ވަކިވީ މި މައްސަލަގަނޑުގެ ތެރޭގައި ކަމަށްވެއެވެ.
މާލޭ ސިޓީ ކައުންސިލްގެ ހެންވޭރު ދެކުނު ދާއިރާގެ ކައުންސިލަރުގެ މަގާމުގައި ހުންނެވި ޝަމްނާޒު އެ މަގާމުން އިސްތިއުފާދެއްވީ ރައީސް މުއިއްޒު ވެރިކަމާ ހަވާލުވެވަޑައިގަތުމުންނެވެ. އެއަށް ފަހު އޭނާ އައްޔަންކުރެއްވީ ރައީސްގެ ރަސްމީ ގެކޮޅު، މުލިއާގޭގެ ސްޓޭޓް މިނިސްޓަރުގެ މަގާމަށެވެ. ފަހުން ވަނީ އޭނާ އެންވަޔަރަމަންޓު މިނިސްޓްރީގެ ސްޓޭޓް މިނިސްޓަރަކަށް ބަދަލުކުރައްވައިފައެވެ.
މި ކަމާ ގުޅޭގޮތުން ސަރުކާރުންވެސް އަދި ޕޮލިހުންވެސް އިތުރު ތަފްސީލެއް ނުދެއެވެ.
