މިއަހަރު މުޅިން އަލަށް އޮފީސްތަކާ ކުންފުނިތަކަށް ހުޅުވާލައިގެން ބޭއްވި އާބަންކޯ ބައިބަލާ ޗެމްޕިއަންޝިޕް ފައިނަލުގައި އެމް.ޕީ.އެލް ބަލިކޮށް ކުލަބް އާބަންކޯ އިން ކާމިޔާބު ކޮއްފިއެވެ.
ނުވަ ޓީމު ބައިވެރިވި މުބާރާތް ކުރިއަށް ގެންގޮސްފައި ވަނީ ދެ ގުރޫޕަކަށް ބަހައިލައިގެން ކޮންމެ ގުރޫޕަކުން ވެސް އެންމެ މަތިން ޕޮއިންޓް ހޯދާ ދެޓީމް ސެމީފައިނަލަށް ދަތުރުކުރާ ގޮތަށެވެ.
ހުކުރު ދުވަހުގެ ރޭ މުބާރާތުގެ ފުރުތަމަ ސެމީ ފައިނަލު މެޗުގައި ވާދަކުރީ އެމް.ޕީ.އެލް އަދި ރޯޑް ރިކްރިއޭޝަން ކުލަބް (އާރް.އާރް.ސީ) އެވެ. މި ދެ ޓީމު ކުޅެވުނު ދެގޭމް އެއްވަރު ވެގެން ނަތީޖާ ނެރުމުގެ ގޮތުން ގަދަ ހިފުމަކަށް ގޮސް މެޗު ކާމިޔާބުކޮށް އެމް.ޕީ،އެލް ވަނީ ފައިނަލުގެ ޖާގައެށް ކަށަވަރުކޮއްފައެވެ.
ދެވަނަ ސެމީ ފައިނަލް މެޗުގައި ވާދަ ކޮއްފައި ވަނީ ކުލަބް އާބަންކޯ އަދި އެސް.ޓީ.އޯ ރެކްރިއޭޝަން ކުލަބެވެ. މިމެޗު ސީދާ ދެގޭމު ކާމިޔާބުކޮށް އާބަންކޯ ވަނީ ފައިނަލުގެ އަނެއް ޖާގަ ކަށަވަރު ކޮށްފައެވެ.
ތިންވަނަ ހޮވާ މެޗުގައި ވާދަ ކޮއަފައިވަނީ ސެމީ ފައިނަލު މެޗުތަކުގައި ބަލިވި ދެޓީމް ކަމުގައިވާ އާރް.އާރް.ސީ އަދި އެސް.ޓ.އޯ އެވެ. މިމެޗު ކޮޅަކަށް ގޭމެއް ގޮސް އެވަރުވެގެން ނަތީޖާ ނެރެން ޖެހުނީ ގަދަ ހިފުމަކަށް ގޮސްގެނެވެ. ގަދަ ހިފުން 1-2 ގެ ނަތީޖާ އަކުން ކާމިޔާބުކޮށް މުބާރާތުގެ ތިންވަނަ ހޯދައިފައިވަނީ އާރް.އާރް.ސީ އެވެ.
އެމް.ޕީ.އެލް އަދި ކުލަބް އާބަންކޯ ވާދަކުރި ފައިނަލް މެޗު ފޯރިގަދަ ކުޅުމަކައް ފަހު މިމެޗުގެވެސް ނަތީޖާ ނެރެން ޖެހުނީ ގަދަ ހިފުމަކަށް ގޮސްގެނެވެ. ފުރުތަމަ ދެހިފުން ކާމިޔާބުކޮށް ކުލަބް އާބަންކޯ ވަނީ މުބާރާތުގެ ޗެމްޕިއަންކަން ހޯދިއެވެ. ފައިލަކުގައި އެންމެ އާދަޔާ ހިލާފު ކަމަކަށް ފާހަގަ ކުރެވުނީ ގަދަ ހިފުމުގައި އެމްޕީއެލް އިން ބޭރުން އެރި، ކުރިން އެތައް ފަހަރަކު މިސްޓަރ ބައިބަލާ ގެ ޝަރަފު ހޯދާފައިވާ އަސްލަމް ހިފެހެއްޓުމެވެ. ވަގުތު ހަމަވަންދެން އަސްލަމް ހިފެހެއްޓީ އާބަންކޯ ޓީމުގެ މަޝްހޫރު ކައިޓު ސަރފަރ ހަންޓޭއެވެ. މިއީ ބައިބަލާގައި ވަރަށް މަދުން ނޫނީ ނުފެންނަ ހުނަރެކެވެ.
ފައިނަލް މެޗައް ފަހު މުބާރާތުގެ އެކި ވަނަތަކަށް ހޮވުނު ޓީމުތަކާ ކުޅުންތެރިން ވަނީ ހޮވާފައެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވިފައި ވަނީ ކުލަބް އާބަންކޯގެ އިބްރާހިމް ސަމީން (ޝައްމި) އެވެ. މުބާރާތުގެ ފެއާ ޕްލޭ ޓީމަކަށް ހޮވިފައި ވަނީ އެސް.ޓީ.އޯ އާރް،ސީ އެވެ.
މުބާރާތުގެ ގަދަ ފަސް ކުޅުންތެރިނަށް ހޮވިފައިވަނީ އެމް،ޕީ.އެލްގެ އަހުމަދު މުހައްމަދު (އައްމަޑޭ)، އާރް.އާރް.ސީގެ އަހުމަދު ފިރާޒް މޫސާ (ހާނޑޫ)، ކުލަބް އާބަންކޯގެ ތިން ކުޅިންތެރިން ކަމުގައިވާ ރިލްވާން ފަރުހަތު، އިބްރާހިމް ސަމީން (ޝައްމި) އަދި ހަސަން މާހިރް (ހަންޓޭ) އެވެ.
މުބާރާތުގެ އެންމެ މޮޅު ކުޅުންތެރިޔާ ކަމުގައިވާ މިސްޓާ ބައިބަލާ އަކަށް ހޮވިފައި ވަނީ ކުލަބް އާބަންކޯގެ ހަސަން މާހިރު (ހަންޓޭ) އެވެ.
މުބާރާތުގެ ޗެމްޕިއަން ޓީމު ކުލަބް އާބަންކޯ އަށް މެޑަލް އަދި ފައިސާގެ އިނާމުގެ އިތުރުން ޗެމްޕިއަން ތަށި ހަވާލު ކޮއްދެއްވާފައިވަނީ އާބަންކޯގެ ޑެޕިޔޫޓީ މެނޭޖިންގް ޑައިރެކްޓަރު އަހުމަދު ގައިސް އެވެ.
