މާފަރު އެއަރޕޯޓު ސަރަހައްދުން ގޮތް ނޭންގޭ ޖަނަވާރެއް ފެނިއްޖެއެވެ.
ސޯސަލް މީޑިއާގައި ދައުރުވަމުންދާ ވީޑިއޯގެ ސައްހަކަން ކަށަވަރު ކޮށްދެމުން މާފަރުން ވާހަކަ ދެއްކި މީހަކު ބުނީ އެއީ އެރަށު އެއަރޕޯޓު ސަރަހައްދުގައި މަސައްކަތްކުރަން އުޅުނު ބަޔަކު ނެގި ވީޑިއޯއެއް ކަމަށާއި، އެމީހުންނަށްވެސް އެ ރަށުން އަދި ރާއްޖެއިން ނުފެންނަ ވައްތަރެއްގެ ޖަނަވާރެއް ފެނުމުން ވަގުތުން ވީޑިއޯ ކުރުމަށް ފަހު އެއަރޕޯޓު ވެރިންނަށް އެންގި ކަމަށެވެ.
ވީޑިއޯއިން ފެންނަ ގޮތުގައި އެއަރޕޯޓާ ދިމާލު ހޭޅިފަށުން ހަތަރެސްފައި ޖަހާފައިވާ ޖަނަވާރެއް ހިނގާފައި ގޮސް ގަސްތަކުގެ ތެރެއަށް ވަދެއެވެ. މަންޒަރު ދުށް މީހުން ބުނާ ގޮތުން އެ ޖަނަވާރު ބުޅަކަށް ވުރެ ބޮޑެވެ. ނަމަވެސް ކަނޑައެޅިގެން އެއީ ކޮން ވައްތަރެއްގެ ޖަނަވާރެއް ކަމެއް ނޭންގެއެވެ. ބައެއް މީޑިއާ ތަކުން އެއީ މިނިކާވަގެއް ކަމަށް ރިޕޯޓު ކުރިޔަސް އެއީ މިނިކާވަގެއް ކަމެއް މަންޒަރު ދުށް މީހުން ޔަގީން ކޮށެއް ނުދެއެެވެ.
މި ޖަނަވާރު ފެނުމާ ގުޅިގެން މާފަރު ކައުންސިލުގެ އެދުމުގެ މަތިން އެމްއެންޑީއެފުގެ ފަރާތުން ޓީމެއް މިހާރު އެ ސަރަހައްދުގައި ހަރަކާތްތެރިވަމުން އެބަދެއެވެ. މި ޓީމުގެ މަސައްކަތުން ވެސް އެ ޖަނަވާރު މިހާތަނަށް ފެނިފައި ނުވެއެވެ.
