އެމްޑީޕީގެ އަހަރީ ދުވަހުގެ ހާއްސަ މެސެޖު؛ ވަކި ފަރުދަކަށް ވުރެ އެމްޑީޕީ ބޮޑުވާނެ!

މި އަދަކީ ރާއްޖޭގައި އެންމެ ގިނަ ދުވަސްވީ ސިޔާސީ ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީގެ) 18 ވަނަ އަހަރީ ދުވަހެވެ. މިއަދު އެ ޕާޓީން ފާހަގަ ކުރާ އަހަރި ދުވަހުގެ މުނާސަބަތުގައި ޗެއަރޕަސަން ފައްޔާޒު އިސްމާއިލު ވަނީ ޕާޓީ މެމްބަރުންނާއި ސަޕޯޓުކުރާ ފަރާތްތަކަށް މުހާތަބްކޮށް ވާހަކަ ދައްކަވާފައެވެ. އެމަނިކުފާނު އެންމެ ފުރަތަމަވެސް ފާހަގަ ކުރީ އެމްޑީޕީގެ ކުރީގެ ރައީސް އަދި ޕާޓީ އުދެއްދުމުގައި އިސް ދައުރެއް އަދާކުރެއްވި މުހައްމަދު ނަޝީދު ޕާޓީން ވަކިވެ ދިއުމަށް އިޝާރާތްކޮށް، އެމްޑީޕީއަށް ވުރެ ވަކި ފަރުދެއް ބޮޑު ނުވާނެކަން ހާމަކުރަމުންނެވެ. ނަޝީދު އަމިއްލަފުޅަށް ޕާޓީއެއް ހައްދަވަން ނިންމާ އެމަނިކުފާނަށް ތާއިދު ކުރާ މަޖުލިސް މެމްބަރުންނާ އާއްމު މެމްބަރުން ހިމެނޭ ގޮތަށް ވަނީ ’ދަ ޑިމޮކްރެޓްސް‘ ނަމުގައި ސިޔާސީ ޕާޓީއެއް ހައްދަވާފައެވެ. ނަޝީދާއި އެމަނިކުފާނަށް ތާއިދު ކުރާ ބަޔަކު ޕާޓީން ވަކިވިޔަސް ފައްޔާޒު ވިދާޅުވަނީ ވަކި ފަރުދަކަށްވުރެ އެމްޑީޕީއާއި، ގައުމު، އެ ޕާޓީގެ މެމްބަރުންނަށް ބޮޑުވުމަކީ ލިބުނު ކާމިޔާބީއެއްކަމަށެވެ.

ފައްޔާޒް ދެއްވި ހިތާބުގައި އިތުރަށް ވިދާޅުވީ އެމްޑީޕީގެ މި ސަރުކާރުން ވަނީ ރައްޔިތުން އެދޭ ވަރަށް ބޮޑު ކާމިޔާބީތަކެއް ހޯދާފައިކަމަށެވެ. އެހެންނަމަވެސް، އެ ކާމިޔާބީއާ ހަމައަށް ވާސިލުވުމުގައި ޕާޓީގެ އެތެރޭގެ މައްސަލަތަކާ ހުރެ ބޮޑެތި ތަކުލީފުތަކެއް ކުރިމަތިވިކަން ފައްޔާޒް ފާހަގަކުރެއްވިއެވެ

އެމްޑީޕީގެ ޗެއަރޕަސަން ގެ އިތުރުން ސަރުކާރުގެ އިގްތިސާދީ ވަޒީރުކަން ވެސް ކުރައްވާ ފައްޔާޒު ވިދާޅުވި ގޮތުގައި، ފާއިތުވެދިޔަ ފަސް އަހަރަކީ ރާއްޖެއަށް ބޮޑެތި ކުރިއެރުންތަކެއް އެމްޑީޕީގެ މެންބަރުން ހޯދި ސަރުކާރުން ގެނެސްދިން އަހަރުތަކެކެވެ. އަދި އެ ކުރިއެރުންތަކުގެ ސަބަބަކީ އެމްޑީޕީގެ ލޮބުވެތި މެންބަރުން ކުރި މަސައްކަތްކަމަށް ފައްޔާޒު ވިދާޅުވިިއެވެ.

ފައްޔާޒު ވިދާޅުވާ ގޮތުގައި ފަސް އަހަރުގެ ތެރޭގައި ހޯދުނު ކާމިޔާބީ، ޒަމާންތަކަކަށް ދެމެހެއްޓޭނެ ގޮތަކީ މި ސަރުކާރު ދެވަނަ ދައުރަކަށް އިންތިހާބު ކުރުމެވެ. އަމިއްލަ ރަށުގައި އާއިލާއަށް ރަނގަޅު އާމްދަނީ ލިބޭނެ މަގެއް ހުޅުވޭ ބޮޑު ދޮރާށިން ދެވޭނެ ދުވަހަކީ އަންނަ ސެޕްޓެމްބަރު މަހު ތިލަފަތަށް ލާ ވޯޓުކަމަށް މިނިސްޓަރ ފައްޔާޒު ވިދާޅުވިއެވެ.

އެމްޑީޕީގެ އަހަރީ ދުވަސް ފާހަގަކުރާއިރު އެ ޕާޓީއަށް ލިބިފައިވާ އެންމެ ބޮޑު ނިކަމެތިކަމަކީ، ޕާޓީއަށް ވެރިކަން ހޯދައިދިނުމަށް މަސައްކަތް ކުރި މެމްބަރުން، އެންމެ ފަހުން ސަރުކާރު ވައްޓާލަން، ރައީސަށް ދަތިކޮށް ދެވަނަ ދައުރެއް ހޮވުނަ ނުދޭން ފަށާފައިވާ މަސައްކަތެވެ. ނަޝީދަށް ބާރު ހޯދައި ދިނުމުގެ ނަމުގައި މަސައްކަތް ފެށި ’ފިކުރުގެ ދިރުމުގެ‘ މެމްބަރުން މިހާރުވަނީ އިދިކޮޅު ލީޑަރު ކުރީގެ ރައީސް ޔާމީނާއި އެމަނިކުފާނުގެ ޕީޕީއެމާއި އެކު މަސައްކަތް ފަށާފައެވެ.