މި ހަފުތާ ބުރާސްފަތި ދުވަހަކީ ސަރުކާރު ބަންދު ދުވަހެއް ކަމަށް ކަނޑައަޅައިފިއެވެ.
ރައީސް އޮފީހުން މިއަދު ބުނީ ބުރާސްފަތި ދުވަސް ބަންދު ކުރަނީ މިއަހަރުގެ ބަންދު ދުވަސްތަކުގެ ގޮތުގައި އެ ދުވަސް ހިމަނާފައިވާތީ ކަމަށެވެ.
“2023 ވަނަ އަހަރުގެ ބަންދު ދުވަސްތަކުގެ ގޮތުގައި އިތުރު ދުވަސްތަކެއް ކަނޑައަޅުއްވައި، ރައީސުލްޖުމްހޫރިއްޔާގެ އޮފީހުން 8 ޑިސެންބަރު 2022 ގައި ނެރުއްވި ދެންނެވުމުގައި، މި ސެޕްޓެންބަރު މަހުގެ 28 ވާ ބުރާސްފަތި ދުވަސް ހިމަނުއްވައިފައިވާތީ، އެ ދުވަހަކީ ސަރުކާރު ބަންދު ދުވަހެއް “ ކަމަށް ރައީސް އޮފީހުގެ ދެންނެވުމުގައިވެއެވެ.
ބުރާސްފަތި ދުވަސް ސަރުކާރު ބަންދު ކުރިއިރު އަންނަ ހޮނިހިރު ދުވަހު ރިޔާސީ އިންތިޚާބުގެ ދެވަނަ ބުރު ބޭއްވުމަށް ވަނީ ނިންމާފައެވެ. ވޯޓުލާ ދުވަހާއި ގުޅިގެން އެކަމުގައި (ވޯޓުލާ މަރުކަޒުގައި ހަރަކާތްތެރިވާން) ސަރުކާރުގެ ގިނަ މުއައްޒަފުންތަކެއް ހަރަކާތްތެރިވާތީވެ، ޖެހިގެން އަންނަ އާދިއްތ ދުވަސްވެސް އާއްމުކޮށް ބަންދު ދުަހެއް ކަމަށް ހަމަޖައްސައެވެ.
