ރާއްޖޭގެ ފުޓުބޯޅައިގެ ތަރި މުހައްމަދު އާރިފް (ބަކާ) ނިޔާވެއްޖެއެވެ.
އޭޑީކޭ ހޮސްޕިޓަލުގެ އައިސީޔޫގައި ފަރުވާދެމުން ދަނިކޮށް ބަކާ ނިޔާވީ މިއަދުގެ ވަގުތެއްގައެވެ. ވަރަށް ބޮޑަށް ހުންއައިސްގެން އޭޑީކޭ ހޮސްޕިޓަލުގައި ބަކާ އެޑްމިޓު ކުރީ ރޭގެ ވަގުތެއްގައެވެ. އޭރުން ފެށިގެން ފަރުވާ ދެމުން ދިޔައީ އައިސީޔޫގައެވެ.
ސައުދީ ރަސްގެފާނުގެ ދައުވަތުފުޅަށް މިފަހަރު ހައްޖަށް ދިޔަ، 38 އަހަރުގެ ބަކާ ރާއްޖެ އައީ މީގެ 3 ދުވަސްކުރިންނެވެ. ހައްޖުން އެނބުރިއައި އިރުވެސް ބަކާ އުޅުނީ ބަލިކޮށް ކަމަށްވެއެވެ. ހުންއައިސް މާބޮޑަށް ވަރުދެރަވެ އަދި ނޭވާލާން އުނދަގޫ ވުމުން ހޮސްޕިޓަލުގައި އެޑްމިޓު ކުރިއިރު މޭގައި ވަރަށް ބޮޑަށް އިންފެކްޝަން އުފެދިފައިވާ ކަމަަށް ބަކާގެ ގާތް ފަރާތްތަކުން މައުލޫމާތުދެއެވެ.
މުހައްމަދު އާރިފް (ބަކާ) އަކީ މި ފަހުން ފުޓްބޯޅައިގަ ރާއްޖޭގައި އުފެދުނު އެންމެ ހުނަރުވެރި މިޑްފީލްޑަރެކެވެ. ގައުމީޓިމާއި ކުލަބު ފުޓްބޯޅައިގައި އެތައް ކާމިޔާބެއް ހޯދާފައިވާ ބަކާގެ އެންމެ ހާއްސަ ކާމިޔާބަކީ ގައުމީޓީމާއެކު ސާފު ޗެމްޕިއަންޝިޕު ކާމިޔާބު ކުރުމެވެ.
