މީގެ ހަތަރު ދުވަސް ކުރިން އާއިލާއަށް ހަބަރު ނުވެ، ގެއްލިގެން ހޯދާ އައިޝަތު ޒޯޔާ އަދިވެސް ނުފެންނަ ކަމަށް އާއިލާއިން ބުނެފިއެވެ.
އުމުރުން 14 އަހަރުގެ ޒޯޔާ ހޯދުމަށް މިއަދު ފުލުހުންގެ އެހީތެރިކަމަށް އާއިލާއިން އެދިފައިވާއިރު، ފުލުހުން ބުނެފައިވަނީ އާއިލާއަށް ހަބަރު ނުވެ ގެއްލިގެން ހޯދަމުންދަނީ ތ.މަޑިފުށި، ނައިޓްރޯޒް އައިޝަތު ޒޯޔާ ފިކުރީއެެވެ. މިހާރު ވިލިމާލޭގައި ދިރިއުޅެމުންދާ ޒޯޔާ އެންމެ ފަހުން ފެނިވަނީ މީގެ 4 ދުވަސް ކުރިން (މިމަހުގެ 21 ވަނަ ދުވަހު) އޭނާ ދިރިއުޅޭ ގެއިންނެވެ.
ފުލުހުންވަނީ އެ ކުއްޖާއާ ގުޅޭ އެއްވެސް މައުލޫމާތެއް އިނގޭނަމަ ވިލިމާލެ ޕޮލިސްގެ ނަންބަރު 9790083 ނުވަތަ ޕޮލިސްޓް ހޮޓްލައިން 3322111 އަށް ގުޅުމަށް އެދިފައެވެ.
މީހުން ގެއްލިގެން ދޭތެރެދޭތެރެއިން ރިޕޯޓުކުރެއެވެ. ނަމަވެސް ހޯދަން އިއުލާނުކުރާ ހިސާބުން ފެނި އާއިލާއާއި ހަވާލުވުމުން އެމީހުން ގެއްލެން ދިމާވި ސަބަބެއް ހާމައެއްނުކުރެއެވެ. މީގެ ކުރިން ޕޮލިހުން ބުނެފައިވަނީ ގެއްލޭ މީހުންގެ މައުލޫމާތު ހާމަކުރުމަށް އާއިލާތަކުން ހިތްހަމަ ނުޖެހޭ ކަމަށެވެ.
