ކޯޓު އަމުރެއްގެ ދަށުން ށ.ނަރުދޫއަށް ޕޮލިހުން ގޮސް ކުޑަ ދެކުދިން ގެނައުމުން އެރަށުގައި މިއަދު ހަމަ ނުޖެހުން ހިނގައިފިއެވެ.
ށ.ނަރުދޫއިން ވާހަކަދެއްކި މީހަކު ބުނީ ވަކިވެފައިވާ ދެމަފިރިންގެ ތެރެއިން ބައްޕަ ކައިރީގައި ތިބި ދެކުދިން ހޯދުމަށް އެ ކުދިންގެ މަންމަ ކޯޓަށް ހުށައެޅި މައްސަލަ ކާމިޔާބުވެ، މަންމަ ދިޔައީ އެކުދިން ބަލައެވެ. އެ ދެކުދިން ބަލާ މަންމަ އައީ ފުލުހުންވެސް ގޮވައިގެންނެވެ. ހަމަނުޖެހުން ހިނގީ ފުލުހުން މެދުވެރިކޮށް އެ ދެކުދިން ގެންދަން އުޅުމުންނެވެ. މި މައްސަލާގެ ވީޑިއޯތަކެއް ސޯސަލް މީޑިއާގައި ދައުރުވަމުންދާއިރު، ފެންނަނީ ގިނަ އަދަދެއްގެ ފުލުހުންނާއި އެކު ދެ އަންހެނުން ނަރުދޫގެ ގެއަކަށްވަދެ ދެ ކުދިން ގެންދާ މަންޒަރެވެ. އެ ކުދިން ގެންދަން އުޅުމުން އެ ކަމާ ހުރަސް އަޅަން މަސައްކަތްކުރި މީހުން ދުރަށް ޖައްސަން މަސައްކުރި ވަގުތު ކޮންމެވެސް ވަރަކަށް ހަމަނުޖެހުން ހިނގާ މަންޒަރުވެސް ފެނެއެވެ.
އެ ރަށުން ވާހަކަ ދެއްކި މީހަކު ބުނީ އެކުދިން މަންމަ ކައިރިއަށް ދާން ބޭނުން ނުވާ ކަމަށާއި ގަދަކަމުން ފުލުހުންނާއެކު ގެންދަން އުޅުމުން އެކުދިން ތިބީ ވަރަށް ބޮޑަށް ބިރުގަނެފައެވެ. އަދި ނަފްސާނި ގޮތުންވެސް އަސަރުކުރާނެ ކަމަށް ބެލެވޭ ކަމަށާއި އެކުދިން ގެންފިޔަ ވަގުތު ދެ ފަރާތުންވެސް ކަންތައްކުރީ އެ އުމުރުގެ ކުދިން ކުރިމަތީގައި ކުރަން ނުވާވަރުގެ ކަންތައްތައް ކަމަށެވެ.
https://www.youtube.com/shorts/MzDF-WulFV4
ފުލުހުންގެ އެހީތެރިކަމާއެކު އެ ދެކުދިން ގޮވައިގެން މިހާރުވަނީ ނަރުދޫއިން ފުރާފައެވެ. މި މައްސަލަ ހިއުމަންރައިޓްސް ކޮމިޝަނަށާއި ދައުލަތުގެ ކަމާބެހޭ ހުރިހާ އިދާރާތަކަށް ހުށައަޅާނެ ކަމަށް އެކުދިންގެ ބައްޕަ ފަރާތު އާއިލާއިން ވަނީ ބުނެފައެވެ.
