ކޮވިޑު ފެތުރުން އިތުރުވުމާ ގުޅިގެން މާލޭ ސަރަހައްދުގެ ފިޔަވަޅުތައް އަނެއްކާވެސް ހަރުކަށިކޮށްފިއެވެ. މިގޮތުން ކާބޯތަކެތީގެ ހިދުމަތްދޭ ތަންތަނުގެ ތެރެއިން ކެފޭ ރެސްޓޯރެންޓު ފަދަ ތަންތަނުން ރޭގަނޑު 8 ގެ ފަހުން ހިދުމަތްދިނުންވަނީ މަނާކޮށްފައެވެ.
ޑިރެކްޓަ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު މިރޭ ނެރުއްވި އެންގުމުގައި ވަނީ، މާލެ އާއި ވިލިމާލެ އާއި ހުޅުމާލެ އާއި ތިލަފުއްޓާއި ގުޅީފަޅުގައި ހިންގާ ކެފޭ/ރެސްޓޯރަންޓުތަކުގައި ތިބެގެން ކެއުންބުއިމުގެ ހުއްދަ އޮންނާނީ ހޮނިހިރު ދުވަހުން ފެށިގެން ކޮންމެ ރެއެއްގެ 8 ޖެހުމާ ހަމައަށް ކަމަށެވެ. އޭގެ ފަހުން ޓޭކްއަވޭ/ޑެލިވަރީގެ ޚިދުމަތް ދިނަސް އެ ކަން ވެސް ކުރެވޭނީ ރޭގަނޑު 10:30 އާ ހަމައަށް ކަމަށް މައިމޫނާގެ އެންގުމުގައި ވެ އެވެ. މި ފިޔަވަޅުތައް އަޅާފައިވަނީ މިމަހު 27 (އަންނަ ހޮނިހިރު ދުވަހުން) ފެށީގެން 7 ދުވަހުގެ މުއްދަތަށެވެ.
މާލެ ސަރަހައްދުގައި ކޮންމެ ދުވަހެއްގެ ވެސް ކޮވިޑު ކޭސްތަކުގެ އަދަދު 100 އިން ދަށަށް ނުދާތާ ދުވަސްތަކެއް ވެފައިވާއިރު، އެއީ ސިއްހީ ދާއިރާގެ މީހުންގެ ކަންބޮޑުވުމަކަށް ވަނީ ވެފަ އެވެ. ކޮވިޑު ފެތުރުން ކޮންޓްރޯލް ކުރުމަށްޓަކައި މިހާރު ވެސް ހަވީރު 6 އިން ފަތިހު 6 އަށް މާލެ ސަރަހައްދުގައި ވެހިކަލް ދުއްވުން ވަނީ މަނާކޮށްފަ އެވެ. އަދި ރޭގަނޑު 11 އިން ފެށިގެން ފަތިސް ވަންދެން އޮންނަނީ ކާފިއު ހިންގައިފަ އެވެ. އެކަމަކު، އެ ފިޔަވަޅުތަކާ އެކު، ކޮވިޑު ކޭސްތަކުގެ އަދަދު ދަށަކަށް ނުދެ އެވެ.
