ބްރޯޑްކާސްޓިންގް ކޮމިޝަނުގެ ހުސްވެފައިވާ މެމްބަރުކަމުގެ މަގާމަށް ކުރިމަތިލި ފަރާތްތަކުގެ ތެރެއިން ރައިސުލްޖުމްހޫރިއްޔާ މަޖިލީހަށް ފޮނުއްވި ލިސްޓުގެ ކުރީގައި އޮތް ދެ ނޫސްވެރިންކަމަށްވާ މުހައްމަފު ފަޒީން އާއި ޝިފްޒާ މުސްތަފާ އެ ކޮމިޝަނަށް އައްޔަން ކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމެޓީން ރުހުންދީފިއެވެ.
ބްރޯޑްކޮމް އަށް އައްޔަނުކުރުމަށް ރައީސް ވަނީ މަޖިލީހަށް 11 ނަމެއް ފޮނުއްވާފައިވެއެވެ. މި ހުރިހާ ބޭފުޅުންނާއި އިންޓަރވިއުކޮށް، ރިޕޯޓު އެކުލަވާލާނީ މަޖިލީހުގެ މިނިވަން މުއައްސަސާތަކުގެ ކޮމިޓީންނެވެ.
އެގޮތުން، އެ ކޮމިޓީގެ މުގައްރިރު އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ސޮއި ކުރައްވައި، ފޮނުއްވެވި ރިޕޯޓުގައި ވަނީ ދެ ނޫސްވެރިއެއްގެ ނަމެވެ. އެއީ ފަޒީން އާއި ޝިފްޒާ އެވެ. މި ދެ ނޫސްވެރިންނަށް ކޮމިޓީގެ ތިންބައިކުޅަ ދެބައި އަގުލަބިއްޔަތު ވަނީ ލިބިފައެވެ.
ކޮމިޓީން ރުހުން ދިން ދެ ނޫސްވެރިންގެ ތެރެއިން ބްރޯޑްކޮމްއަށް އައްޔަންކުރާނީ އެންމެެ ފަރާތެކެވެ. އެ ފަރާތް އަައްޔަންކުރުމަށްޓަކައި ރައްޔިތުންގެ މަޖިލީހުގައި ވޯޓަށް އަހާނެއެވެ. އައްޔަންކުރެވޭނީ މަޖިލީހުގެ އަގުލަބިއްޔަތު ލިބޭ ފަރާތެކެވެ. މީގެ ތެރެއިން އެންމެ ފުރަތަމަ ވޯޓަށް އަހާނީ، ކޮމިޓީއިން މަޖިލީހުގެ ތަޅުމަށް ފޮނުވި ލިސްޓުގެ ކުރީގައި އޮތް ފަޒީންގެ ނަމަށެވެ. ބްރޯޑްކޮމްގެ މަގާމެއް ހުސްވީ ކުރިން އެ ކޮމިޝަންގެ މެމްބަރުގެ މަގާމުގައި ހުންނެވި ޒީނާ އިސްތިއުފާ ދެއްވުމާއި ގުޅިގެންނެވެ. އޭނާ އިސްތިއުފާ ދެއްވީ އޮކްޓޯބަރު މަހުގެ 28 ވަނަ ދުވަހުއެވެ. ޒީނާ އިސްތިއުފާ ދެއްވިއިރު އޭނާގެ އިތުބާރު ނެތްކަމަށް މަޖިލީހުގެ މިނިވަން މުއައްސަސާތަކުގެ ކޮމިޓީއިން ނިންމައި އޮތީ ތަޅުމަށް ހުށަހަޅާފައެވެ.
