ސަރުކާރުގެ ސިޔާސީ މަގާމުތަކުގައި ތިބި މީހުންގެ އަދަދާއި އެ މީހުންގެ މަސްއޫލިއްޔަތު ހާމަކުރުމަށް ގޮވާލައި، ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ބޭރުކޮށްލައިފިއެވެ.
މަޖިލިސް ޖަލްސާގައި މި މައްސަލަ ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމެވެ.
މެމްބަރު މީކާއިލް މި މައްސަލަ ހުށައެޅުއްވީ ސަރުކާރުން ހަރަދު ކުޑަކުރުމުގެ މަސައްކަތްތަކެއް ފަށާފައިވާ ކަމަށްވިދާޅުވަމުންދާ ދަނޑިވަޅެއްގައި ބައެއް ސިޔާސީ މަގާމުތަކުން މީހުން ވަކި ކުރާނެ ކަމަށް އިއުލާން ކޮށްފައިވާ ދަނޑިވަޅެއްގައެވެ. މީކާއިލް ވިދާޅުވީ މި ސަރުކާރުން އައްޔަން ކޮށްފައިވާ ސިޔާސީ މުއައްޒަފުންގެ އަަދަދު ހާމަ ނުކޮށް ރައްޔިތުންގެ ފައިސާއިން އެމީހުންނަށް މުސާރައާއި އިނާޔަތްތައް ދެވިގެން ނުވާނެއެވެ.
މީކާއިލް ހުށައެޅުއްވި މައްސާލަގައި ސިޔާސީ މަގާމުތަކުގައި ތިބި މީހުންގެ އަދަދާއި، އެ ފަރާތްތަކުގެ މަގާމުގެ މަސްއޫލިއްޔަތު ހާމަކޮށްދިނުމަށް ގޮވާލައި، އެ ކުއްލި މައްސަލަ މީކާއީލް ހުށަހެޅުއްވިއެވެ.
މިއަދު މަޖިލީހަށް 68 މެންބަރުން ހާޒިރުވެވަޑައިގެން ތިއްބެވިއިރު، އެ މައްސަަލަ ބަލައިގަންނަން ފެންނަ ކަމަށް ވޯޓު ދެއްވީ އަށް މެންބަރުންނެވެ. އަދި, އެ މައްސަލަ ބަލައިގަންނަން ނުފެންނަ ކަމަށް ލިބުނު 59 ވޯޓާ އެކު، އެ މައްސަލަ ވަނީ މަޖިލީހުގެ ތަޅުމުން ބޭރުކޮށްލައިފައެވެ.
މި ސަރުކާރު ފެށުނީއްސުރެ އެންމެ ގިނައިން ފާޑުކިޔަމުން އަންނަނީ ރައިސް އައްޔަން ކުރައްވާ ސިޔާސީ މަގާމުތަކުގެ އަދަދު ސިއްރު ކުރައްވާ މައްސަލައެވެ. މީޑިއާއިންނާއި ރައްޔިތުންގެ މަޖުލީހުގެ މެމްބަރުން މެދުވެރިކޮށްވެސް ސަރުކާރުގެ ސިޔާސީ މަގާމުތަކުގެ އަދަދު ހާމަ ކުރުމަށް ކުރަމުން އަންނަ މަސައްކަތަށް މިހާތަނަށް ސަރުކާރުން އެއްބާރުލުން ދީފައި ނުވެއެވެ. އިދިކޮޅު ފަރާތްތަކުން ތުހުމަތުކުރާ ގޮތުގައި މި ސަރުކާރުގެ ސިޔާސީ މަގާމުތަކުގެ އަދަދު 2000 އަށް ވުރެ ގިނައެވެ.
