ރައްޔިތުން މަޖުލީހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާހު ކަމަށް ބުނެ ސޯސަލް މީޑިއާގައި ދައުރުވަމުންދާ ވީޑިއާގައި ހަރަކާތްތެރިވަނީ ފަލާހު ނޫން ކަމަށް ޕީއެންސީން ބުނެފިއެވެ.
ސަރުކާރު ހިންގާ ޕާޓީ ޕީއެންސީގެ ޕާލިމެންޓު ގުރޫޕުގެ ލީޑަރުކަންވެސް ކުރަމުންދާ ފަލާހުގެ ދިފާއުގައި މިއަދު ނެރުނު ނޫސް ބަޔާނުގައި އެ ޕާޓިންވަނީ މެންބަރު އިބްރާހީމް ފަލާހާ ގުޅުވައި ސޯޝަލް މީޑިއާގައި ފަތުރަމުންގެންދާ ވާހަކަތައް ދޮގުކޮށް، އެ ޕާޓީން އެކަން ހަރުކަށި އިބާރާތުން ކުށްވެރިކޮށްފައެވެ.
ޕީއެންސީގެ ބަޔާނުގައި ބުނެފައިވަނީ ފޮޓޯއާއެކު ހަގީގަތާ ޚިލާފު ދޮގު ޚަބަރު ރޭގެ ވަގުތެއްގައި އެންމެ ފުރަތަމަ ފަތުރާފައިވަނީ، ފިތުނަ އުފެއްދުމުގައި ހައްދުފަހަނައަޅާފައިވާ ހަސަން ކުރުސީ ނަމުގައި ހަދާފައިވާ ފޭކް އެކްސް އެކައުންޓަކުން ކަމަށެވެ. މި ނޫން ވެސް އިތުރު ފަރާތްތަކުން މި ފަދަ ހަގީގަތާ ޚިލާފު ދޮގު ވާހަކަތައް ގެންދަނީ ފަތުރަމުން ކަމަށް އެ ބަޔާނުގައިވެއެވެ. އެފަދަ ދޮގު ވާހަކަ ފަތުރައި، ފިތުނަ އުފައްދަން މަސައްކަތް ކުރާ ފަރާތްތަކުގެ މައްސަލަ ބަލައި ފިޔަވަޅު އެޅުމަށް ދިވެހި ފުލުހުންގެ ޚިދުމަތަށް ޕީއެންސީން ވަނީ ގޮވާލާފައެވެ.
މެމްބަރު ފަލާހު ކަމަށް ބުނެ ސޯސަލް މީޑިއާގައި ދައުރުވަމުންދާ ވީޑިއޯގައި ފެންނަނީ ދެ ފިރިހެނުން އެއް ޖިންސުން ގުޅުން ހިންގާ މަންޒަރެވެ. މި ދެ ވީޑިއޯގައި ހަރަކާތްތެރިވަނި އެއްބައެއް ކަމަށް ބެލެވޭއިރު ދެވަނަ ވީޑިއޯގައި ފެންނަނީ ބަރަހަނާ ހާލުގައި ފިރިހެނަކު މަސާޖުކުރާ މަންޒަރެވެ. މި ދެ ވީޑިއޯގައި ހަރަކާތްތެރިވާ ދެ ފިރިހެނުންގެ ތެރެއިން އެކަކަކީ ފަލާހު ކަމަށް ސޯސަލް މީޑިއާގައި އަންނަނީ ތުހުމަތު ކުރަމުންނެވެ.
