މާލޭ ގެސްޓު ހައުސެއްގެ ތެރޭގައި ބިދޭސީއަކު ރަހީނުކޮށް، ބަންދުކޮށްގެން ގެންގުޅެނިކޮށް މިރޭ ފުލުހުން އެ މީހާ ސަލާމަތްކޮށްފިއެވެ.
ފުލުހުން މައުލޫމަތު ދިން ގޮތުގައި ބަންދުކޮށްފައިވަނީ ނޭޕާލު މީހެކެވެ. އެއީ ފިރިހެނެއް ކަމަށާއި އޭނާގެ ހާލު ރަނގަޅުކަމަށް ފުލުހުން ބުންޏެވެ. އޭނާ ބަންދުކޮށްގެން ގެންގުޅެފައިވަނީ މާފަންނު ގެސްޓު ހައުސެއްގައެވެ. މައްސަލާގައި ހިމެނެނީ ބަނގުލަދޭޝް ދެ މީހުން ކަމަށާއި އެ މީހުން މިހާރު ފުލުހުންގެ ބެލުމުގެ ދަށަށް ގެނެސްފައިވާ ކަމަށް ފުލުހުން މައުލޫމާތު ދެއެވެ.
ގެސްޓުހައުސް ހިމެނޭ ސަރަހައްދުގައި ފުލުހުން ހަރަކާތްތެރިވާއިރު ނޭޕާލު މީހާ ރަހީނު ކުރި ސަބަބެއް ފުލުހުން ހާމައެއް ނުކުރެއެވެ.
މީހުން ރަހީނުކުރުމުގެ މައްސަލަތައް މި ފަހުން ގިނަވެފައިވާއިރު، ގިނަ ފަހަރަށް ރަހީނު ކުރަނީ ފައިސާގެ ބޭނުމުގައެވެ.
