ރައީސް ޑރ.މުހައްމަދު މުއިއްޒު ދެކުނުގެ އަތޮޅުތަކަށް ކުރެއްވި ދަތުރުފުޅުގައި ގދ.ގައްދޫއަް ވަޑައިގެން އެ ރަށު ކައުންސިލު އިދާރާގައި ބައްދަލުވުން ބޭއްވުމަށް ދެކޮޅު ހައްދަވައިފިއެވެ.
ގައްދޫ ކައުންސިލުން މައުލޫމާތުދޭ ގޮތުގައި، ރައީސް ޑރ.މުއިއްޒު ވިދާޅުވީ ގައްދޫ ކައުންސިލަކީ އެ ބޭފުޅުންނަށް ރައްކާތެރި ތަނެއް ނޫން ކަމަށެވެ. އެހެން ވިދާޅުވެ ކައުންސިލު މެމްބަރުންނާއި އަދި އެނޫންވެސް ފަރާތްތަކާއި ކައުންސިލު އިމާރާތުގައި ބައްދަލުވުން ބޭއްވުމަށް ދެކޮޅު ހައްދަވައި އެ ބައްދަލުވުން ވަނީ އެހެން ތަނަކަށް އަމިއްލަފުޅަށް ބަދަލުކޮށްފައެވެ. މީގެ އިތުރުން ގދ.ގައްދޫއަށް ޒިޔާރަތްކުރާ އިއްޒަތްތެރިންނާއި މެހެމާނުން ސޮއިކުރާ ފޮތުގައި ރައީސް ޑރ.މުހައްމަދު މުއިއްޒު ސޮއިވެސް ނުކުރެއްވިއެވެ. ރައީސްގެ ބަސްކޮޅެއް ލިޔެދެއްވުމާއި މެހެމާނުން ސޮއިކުރާ ފޮތުގައި ސޮއިކުރަން ދެންނެވެމުން އެކަން ކުރަންވެސް ދެކޮޅު ހެއްދެވިއެވެ.
މި ހުރިހާ ކަމެއް ކުރައްވާފައިވަ ގައްދޫގައި ބޭއްވި ޖަލްސާގައި ރައީސް ވިދާޅުވެފައިވަނީ ގައްދޫ ކައުންސިލުން އެއްބާރުލުން ނުދޭ ކަމަށާއި ގައްދޫ ކައުންސިލުގެ އަމަލުތަކަށް ވަރަށް ބޮޑަށް ފާޑުވިދާޅުވެފައެެވެ. މި ކަމާއި ގުޅިގެން ގައްދޫ ކައުންސިލުން ނެރުނު ބަޔާނެއްގައި ބުނެފައިވަނީ ގައްދޫ ކައުންސިލުގެ ނައިބް ރައީސް ހަދީޖާ އަހުމަދު ޗުއްޓީގައި ހުންނަވަނިކޮށް ލޯކަލް ގަވަރުމަންޓު އޮތޯރިޓީގެ ސީއީއޯ މަރިޔަމް ޒުލްފާ ފޯނުން ގުޅުއްވައި ރައީސްގެ ޖަލްސާގައި ބައިވެރިވުމަށް މަޖުބޫރުކޮށްފައިވާ ކަމަށެވެ.
ގައްދޫ ކައުންސިލަށް ރައީސް ޑރ.މުހައްމަދު މުއިއްޒު ފާޑު ވިދާޅުވުމުން އެކަމަށް ރައްދުދީ ބުނެފައިވަނީ ”މި ކައުންސިލުން ރައީސުލްޖުމްހޫރިއްޔާއަށް އަޅުދާސްވެ ގުލާނެއް ނުކުރާނެއެވެ. އެހެން ނަމަވެސް ގައްދުއަށާއި ރައްޔިތުންނަށް ސަރުކާރުން ކޮއްދެއްވަން ބޭނުންފުޅުވާ ހުރިހާ ކަމަކަށް އެންމެ ފުރިހަމަ އެއްބާރުލުން ދިނުމުގައި ކައުންސިލު އަބަދުވެސް ދެމިއޮންނާނެއެވެ. ގައްދޫ ރައްޔިތުން ބޭނުންވާ ކަންކަމާއި ގައްދޫގެ ތަރައްގީއާއި ކުރިއެރުމަށްޓަކައި ބޭނުންވާ އެހެންވެސް ކަންކަން ރައީސުލްޖުމްހޫރިއްޔާ އިންތިހާބު ވުމުގެ ކުރިންނާއި އޭގެ ފަހުންވެސް ތަފްސީލުކޮށް ދެންނެވިފައިވާނެއެވެ. އަނެއް އިންތިހާބު ބޯމަތިވުމުން ރައްޔިތުންގެ ފަރާތުން އެކަންކަން ތަކުރާރު ކުރުވަން އެންގުމަކީ އަޅުދާސް ކުރުވުމެވެ. ރައީސުލްޖުމްހޫރިއްޔާ އިންތިހާބުވެ ހަތަރުމަސް ނުވަނީސް ހަނދުމަފުޅު ނެތުމަކީ މިކައުންސިލުގެ ކުށެއްނޫނެވެ. އަދި ރައީސުލްޖުމްހޫރިއްޔާއަށް ސީދާކޮށް ތާއިދެއް ނެތުމަކީ މި ކައުންސިލުގެ ކުށެއް ނޫންކަމުގައި ދަންނަވަމެވެ. އެއީ ގައްދޫގެ ތަރައްގީއާއި ކުރިމަގަށް ހުރަސްއެޅެންޖެހޭ ކަމެއް ކަމަށްވެސް މި ކައުންސިލުން ނުދެކެމެވެ.
ގައްދޫ ކައުންސިލުގެ ބަޔާން ނިންމާލަމުން ބުނެފައިވަނީ ”ސިޔާސީ ވަކި މަންފާއެއް ހާސިލުކުރުމަށްޓަކައި ހަގީގަތާއި ހިލާފަށް، ރައީސުލްޖުމްހޫރިއްޔާ، މި ކައުންސިލު ބަދުނާމުކޮށް ދައްކަވާފައިވާ ވާހަކަތައް ހަރުކަށި އިބާރާތުން ކުއްވެރިކުރަމެވެ. އަދި ކައުންސިލާއި ގައްދޫ ރައްޔިތުން ބަލިކަށި ކޮށްލުމަށްޓަކައި، ލޯކަލް ގަވަރުމަންޓު އޮތޯރިޓީ މެދުވެރިކޮށް ބިރުދައްކަވަމުން ތިޔަ ގެންދަވާ ހުރިހާ ކަމެއް ހުއްޓާލެވުމަށްވެސް ދަންނަވަމެވެ.
