މަޖީދީ މަގު ޒިކުރާ މިސްކިތުގެ ބިމުގައި 3 ބުރީގެ މިސްކިތެއް ބިނާ ކުރުމަށް އެސްޖޭ ކޮންސްޓްރަކްޝަނާއި ހަވާލުކޮށްފިއެވެ.
އިސްލާމިކް މިނިސްޓްރީގައި ބޭއްވި ރަސްމިއްޔާތެއްގައި މިސްކިތް އެޅުމުގެ އެއްބަސްވުމުގައި ސޮއިކުރެއްވީ އިސްލާމިކް މިނިސްޓަރ ޑރ.މުހައްމަދު ޝަހީމު އަލީ ސައީދެވެ. އެސްޖޭގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރ ޝިހާދު އިބުރާހިމެވެ. އިސްލާމިކު މިނިސްޓްރީން މައުލޫމާތުދޭ ގޮތުގައި ޒިކުރާ މިސްކިތް އަޅާނީ އެސްޖޭގެ އަމިއްލަ ހަރަދުގައެވެ.
ރައީސް ޔާމީނުގެ ވެރިކަމުގައި 10 ބުރިއަށް ހަދަން ހަވާލު ކުރި ޒިކުރާ މިސްކިތް ނުނިމުމުން އެ ތަނުގައި ވަނީ ވަގުތީ މިސްކިތެއް އަޅާފައެވެ. މައްޗަންގޯޅި ސަރަހައްދާއި މަޖީދީމަގުގެ ގިނަ އަދަދެއްގެ ބަޔަކު ބޭނުންކުރަމުންދާ ޒިކުރާ މިސްކިތް ބިމުގައި ވަގުތީ މިސްކިތް ހެދުމުގެ މަސައްކަތްކުރީ އެމްއެންޑީއެފުންނެވެ.
ޒިކުރާ މިސްކިތް އެޅުމަށް ރައީސް ޔާމީނުގެ ސަރުކާރުން ވަނީ އެސްޖޭއަށް 30 މިލިއަން ރުފިޔާ ދީފައެވެ. މި ފައިސާ ހޯދުމަށް ކުރީގެ ސަރުކާރުން އެސްޖޭއާއި ދެކޮޅަށް ދައުވާކުރިއެވެ. އަދި އެ މަސައްކަތް ހާވަލުކުރުމުގައި ކޮރަޕްޝަނާއި އިހުމާލުތަކެއް ހުރުމުން އޭރުގެ އިސްލާމިކު މިނިސްޓަރ ޒިޔާދު ބާގިރު މައްޗަށްވަނީ ދައުވާވެސް އުފުލާފައެވެ. މިއަދު އެސްޛޭއަށް އަލުން މި މަސައްކަތް ހަވާލު ކުރިއިރު، ޒިޔާދު ބާގިރުގެ މައްސަލަވެސް ވަނީ އިއްޔެގެ ވަގުތެއްގައި ކޯޓުން ނަގާފައެވެ.
މިސްކިތްތައް ބިނާ ކުރުމަށް އެތެރެކުރާ މުދަލުންއިމްޕޯޓު ޑިއުޓީ އާއި އެހެނިހެން ޓެކްސްތައް ދައްކަން ނުޖެހޭ ގޮތަށް ސަރުކާރުންވަނީ ހަމަޖައްސައިދީފައެވެ.
