މާލެ ރައްޔިތުންނަށް ގޯތި ދިނުމަށް ހުޅުމާލެ ފޭސް 3 ހިއްކުމުގެ މަސައްކަތް ކުރަނީ އާބަންކޯއަށް ދީފައިވާ ހުއްދައިގެ ބޭރުން ކަމަށް ބުނެ ޕީއެންސީގެ ރިޔާސީ ކެންޑިޑޭޓް ޑރ. މުއިއްޒު އެކަމަށް ވަރަށް ބޮޑަށް ފާޑުކިޔައިފިއެވެ. ރައީސް އިބްރާހިމް މުހައްމަދު ސޯލިހު ވައުދުވެ ވަޑައިގަތް ގޮތަށް މާލެ ރައްޔިތުންނަށް ގޯތި ދޫކުރުމަށް ހިންގާ މަޝްރޫއުގެ ދަށުން ސަރުތު ހަމަވާ އެންމެންނަށް ގޯތި ދެވެން އޮތީ ހުޅުމާލެ ފޭސް 3 ހިއްކައިގެން ކަމަށްވާތީ އެކަން މިހާރުވަނީ އާބަންކޯއިން ފަށާފައެވެ. އެކަމާ ދެކޮޅަށް މުއިއްޒު ވިދާޅުވީ އެއީ އާބަންކޯއަށް އަދި ސަރުކާރަށްވެސް ކުރެވޭނެ ކަމެއް ނޫން ކަމަށާއި އެ ބިމަކީ ސިޓީކައުންސިލުގެ ބިމެއް ކަމަށެވެ. އަދި އެ ބިން ޕްލޭންކޮށްފައިވާނީ އެހެން ކަމަކަށް ކަމަށާއި ހުޅުމާލޭ މާސްޓަރޕްލޭން ބަދަލު ނުކުރެވޭނެ ކަމަށެވެ. ސިޓީ ކައުންސިލާ މަޝްވަރާ ނުކޮށް އެކަން ކުރަމުންދާތީ އެކަން އެގޮތަށް ނުކުރެވޭނެ ކަމަށްވެސް މުއިއްޒު ވިދާޅުވިއެވެ.
މުއިއްޒުގެ ވެރިކަމެއްގައި އާބަންކޯވެސް އުވާލާ މުޅި ހުޅުމާލޭގެ ހުރިހާ މަޝްރޫއެއް ސިޓީކައުންސިލުގެ ދަށަށް ގެންނާނެ ކަމަށްވެސް ވަނީ ވިދާޅުވެފައެވެ.
މުއިއްޒުގެ ދިގު ހައުސިން މިނިސްޓަރުގެ މަގާމުގައި މާލޭގެ އެކި ކަންކަމަށް ވަނީ ބަދަލު ގެނެސް، ރައީސް މައުމޫނާއި ރައީސް ނަޝީދުގެ ބައެއް ޕްރޮޖެކްޓުތައް ހުއްޓާލާފައެވެ. މިގޮތުން ގުޅިފަޅު މަޝްރޫއު ހުއްޓާލުމާއި އެ ތަނުން ފްލެޓް ލިބުނު މީހުންގެ ފްލެޓްތައްވެސް ވަނީ ބާތިލުކޮށްފައެވެ. ގުޅީފަޅުން ފްލެޓް ލިބުނު ފަރާތްތަކަށް ބަދަލު ދީފައިވަނީ މި ސަރުކާރުންނެވެ.
