މި ސަރުކާރުން ފ.މަގޫދޫގައި ހަދަމުންދާ އެއަރޕޯޓު މަސައްކަތު ތަފްސީލު އެމްޓީސީސީން ހާމަކޮށްފިއެވެ.
މި ގޮތުން އެ ކުންފުނިން މައުލޫމާތުދޭ ގޮތުގައި އެއަރޕޯޓު ރަންވޭގެ ސަބްގްރޭޑް އަދި ސަބްބޭސްގެ އެޅުމުގެ މަސައްކަތް މިހާރި ވަނީ 78 އިންސައްތަ ފުރިހަމަކުރެވިފައެވެ. އަދި، ޓެކްސީވޭ އާއި ސަރވިސް ރޯޑްގެ ސަބްގްރޭޑް އަދި ސަބްބޭސް އެޅުމުގެ މަސައްކަތް މިހާރު ވަނީ ނިމިފައެވެ.
މީގެ އިތުރުން، އެއަރޕޯޓް ރޯޑް ހެދުމުގެ މަސައްކަތް މިހާރި ވަނީ 96 އިންސައްތަ ފުރިހަމަކުރެވިފައެވެ. އަދި، ޓާމިނަލް ބިލްޑިންގް އާއި ފަޔަރ ބިލްޑިންގްގެ އެޅުމުގެ މަސައްކަތް ސައިޓުގައި މިހާރު ދަނީ ކުރިއަށްދާ ކަމަށްވެސް އެމްޓީސީސީން މައުލޫމާތުދެއެވެ.
އެމްޓީސީސީއާއި ހަވާލުކޮށްފައިވާ ފ. އެއަރޕޯޓުގެ މަސައްކަތްތަކުގެ ތެރޭގައި، 1,800 އަކަ މީޓަރުގެ ރަންވޭއެއް ހެދުމާއި، 81,443 އަކަ މީޓަރުގެ އޭޕްރަން ހެދުމާއި، 2,919 އަކަ މީޓަރުގެ ޓެކްސީވޭ ހެދުމާއި، 895 އަކަ މީޓަރުގެ ފަޔަރ ޕެޑްއެއް ހެދުމާއި، 3,059 އަކަ މީޓަރުގެ އެއަރޕޯޓް ރޯޑް ހެދުމާއި، 1,185 އަކަ މީޓަރުގެ ސަރވިސް ރޯޑް ހެދުމާއި، ޓާރމިނަލް ބިލްޑިންގއެއް ޤާއިމުކުރުމާއި، ފަޔަރ ބިލްޑިންގ، ފަޔަރ ޕޮންޑް، އަދި އަލިފާން ނިއްވާ ވަސީލަތް ޤާއިމުކުރުމާއި، ސެކިއުރިޓީ ޕޯސްޓަކާއި ސެކިއުރިޓީ ވަސީލަތް ޤާއިމުކުރުމާއި، ފެންސިންގ ޖެހުމާއި، ޕެރިމީޓަރ ލައިޓިންގ ޖެހުމާއި، އެއަރފީލްޑް ލައިޓިންގ ސިސްޓަމެއް ޤާއިމުކުރުމާއި، ނެރު ބައްތި ހަރުކުރުމާއި، މޫސުމާބެހޭ ވަސީލަތްތައް ޤާއިމްކުރުމާއި، ގްރައުންޑް ހެންޑްލިންގ ވަސީލަތްތަށް ޤާއިމުކުރުމާއި، މަގުމަތީ ނިޝާން ހަރުކުރުމުގެ މަސައްކަތް ހިމެނެއެވެ.
މިއީ 264.9 މިލިއަން ރުފިޔާގެ މަޝްރޫޢެކެވެ.
