މަރުކަޒީ ބެންކު އެމްއެމްއޭއިން ހުށައަޅާފައިވާ މަނީލޯންޑްރިންގެ މައްސަލަތަކެއް ތަހުގީގު ކުރަން ފެށުމުން ރާއްޖެ ދޫކޮށް، ތަހުގީގަށް ފިލައިގެން އުޅުނު ލުތުފީ ރާއްޖެ އަތުވެއްޖެއެވެ. ކުރީގެ އެންޓި ކޮރަަޕްޝަން ކޮމިޝަނުގެ ރައީސް ހަސަން ލުތުފީގެ މަައްސަލަތަކުގެ ތަހުގީގުތައް ހުއްޓިފައި ހުރީ ރާއްޖޭގައި ނެތުމާއި ތަހުގީގަށް ހާޟިރު ނުވުމުންނެވެ.
ލުތުފީގެ މައްސަލަ އެންމެ ފުރަތަމަ ސަމާލުކަމަށް ގެނައީ މަނީ ލޯންޑްރީ އާއި ޓެރަރިޒަމަށް ފައިނޭންސް ކުރުން ހުއްޓުވުމަށް މަރުކަޒީ ބެންކު އެމްއެމްއޭއިން އުފައްދާފައިވާ ގައުމީ އިދާރާއިންނެވެ. ރައީސް ޔާމީނުގެ ވެރިކަމުގެ ދުވަސްވަރުވެސް ލުތުފީގެ މައްސަލަތަކެއް އެ އިދާރާއިން ސަމާލުކަމަށް ގެނައެވެ. ލުތުފީ ފިލައިގެން ދިޔައީ މި މައްސަލަތައް ފުލުހުން ބަލަން ފެށުމުންނެވެ.
ރައީސް ޔާމީނުގެ ވެރިކަމުގައި ސިޔާސީ ކުއްވެރިންތަކެއް ދޫކުރުމަށް، 1 ފެބްރުއަރީގައި ސްޕްރީމް ކޯޓުން ނެރުނު އަމުރު ހުއްޓުވަން މަސައްކަތްކޮށް، އެ ފަނޑިޔާރުންނަށް އިންޒާރު ދިން މައްސަލައެއްވެސް އެ ދުވަސްވަރު ވަނީ ފެންމަތިވެފައެވެ. އެ މައްސަލާގައި ލުތުފީ ދިން ބަޔާން ލީކުވެފއިވާ އިރު ލުތުފީ ބުނެފައިވަނ ޖުޑީޝަލް އެޑްމިނިސްޓްރޭޓަރ ހަސަން ސައީދާއި ސްޕްރީމް ކޯޓުގެ ފަނޑިޔާރު އަލީ ހަމީދަށް އިންޒާރު ދެއްވީ ސްޕްރީމް ކޯޓު ތެރެއިން ވެރިކަން ވައްޓާލަން އުޅޭކަން އެނގި އެކަން ނުކުރުމަށެވެ. އެ އަމުރު ނެރުނުކަން އެނގުނު ވަގުތުވެސް ’މިއީ ކޮން ކަމެއްހޭ، ތިހާ މުނާފިގު ވާކަށް ނުވާނޭ“ ކަމަށް ބުނެ އެ ދެ ބޭފުޅުންނަށް ގުޅައި މެސެޖު ކުރަން މަސައްކަތް ކުރި ކަމަށްވެސް އެ ބަޔާނުގައި ލުތުފީ ބުނެފައިވެއެވެ.
ސްޕްރީމް ކޯޓުގެ ދެ ފަނޑިޔާރަކަށް ފްލެޓް ގަނެދޭން ޖޭޕީ ލީޑަރު ގާސިމް އިބްރާހިމް މަސައްކަތް ކުރަމުންދާ ކަމަށްވެސް އެ ދުވަސްވަރު ލުތުފީ ތުހުމަތުކޮށްފައިވެއެވެ.
ވެށިފަހިމާލެ ބޯހިޔާވަހި ކަމުގެ މަޝްރޫއުގެ ދަށުން ލުތުފީއަށް ފްލެޓު ނުލިބުނު މައްސަލާގައިވެސް ލުތުފީ ވަނީ ސަރުކާރާ ދެކޮޅަށް ދައުވާކޮށްފައެވެ. ލުތުފީއަށް ފްލެޓު ނުލިބުނީ ލުތުފީގެ އަންހެނުންގެ ގޯއްޗެއް މާލޭގައި ހުރުމުން އެ ގޮތަށް ގަވައދުގައި ބުނެފައިވާތީއެވެ. އޭގެ ފަހުން ރައީސް ޔާމީނުގެ ވެރިކަމުގައި ލުތުފީއަށްވަނީ އަމީނީމަގު ރެހެންދި ފްލެޓުން ފްލެޓެއް ހަމަޖައްސާދީފައެވެ.
މުރާސިލަށް މައުލޫމާތު ލިބިފައިވާ ގޮތުގައި ލުތުފީ ފިލައިގެން ބޭރުގައި އުޅުމަށްފަހު ރާއްޖެއައިސް ވަރަށް ބުރަކޮށް އުޅެނީ ޕީއެންސީގެ ރިޔާސީ ކެންޑިޑޭޓް ޑރ. މުއިއްޒު ކެމްޕޭނުގައި އައްޑޫ ސިޓީގައެވެ.
ލުުތުފީ ރާއްޖެއައުމުން ޕާސްޕޯޓު ވަނީ ހިފަހައްޓާފައެވެ.
