ސްކޫލް ބަންދާއި، އީދު ބަންދާ ދިމާކޮށް ގިނަ އަދަދެއްގެ ބަޔަކު ކަނޑު ދަތުރުފަތުރުގެ ހިދުމަތް ބޭނުން ކުރަމުންދާތީވެ، އެ ފަދަ އުޅަނދުތަކާއި އެނޫންވެސް ކަނޑުގައި ދުއްވާ އުޅަނދުތައް ޗެކް ކުރުމުގެ މަސައްކަތް ފަށައިފިއެވެ. މޯލްޑިވްސް ޑިފެންސް ފޯސް ގެ ކޯސްޓު ގާު އަދި މޯލްޑިވްސް ޕޮލިސް ސަރވިސް ގުޅިގެން ހިންގަމުންދާ ހާއްސަ އޮޕަރޭޝަނުގައި, އެ ފަރާތްތަކުން ހާމަކުރާ ގޮތުގައި ކަނޑު ދަތުރުކުރާ އުޅަނދު ތަކުގެ ސަލަމާތީ ކަންކަމާއި އެ ފަދަ އުޅަނދުތަކާއި ފަސިންޖަރުންނާއި މުދަލުގެ ރައްކާތެރިކަން ކަށަވަރުކުރުމަށް އަޅަން ޖެހޭ ފިޔަވަޅުތައް އަޅާފައިވޭތޯ ޗެކު ކުރެވޭނެއެވެ.
މި ދުވަސް ވަރަކީ މޫސުން ގޯސް އަދި ކަނޑު ގަދަ ދުވަސް ވަރަކަށް ވުމުން ކަނޑު ދަތުރުކުރާ އުޅަނދު ތަކުން ސަމާލުވުމަށް މެޓް އޮފީހުންވެސް ވަނީ އިލްތިމާސްކޮށްފައެވެ. މޫސުމަށް ބަލާފައި ނޫނީ ނުފުރުމަށާއި މެޓް އޮފީހުންދޭ މޫސުމާ ބެހޭ އެންމެ ފަހުގެ މައުލޫމާތު ތައް ހޯދާ އެއާއި އެއްގޮތަށް އަމަލު ކުރުމަށްވެސް އެފަރާތުން ނަސޭހަތްތެރިވެއެވެ.
ސްކޫލްތަކުގެ ބޮޑު ބަންދާއި އަދި ބޮޑު އީދު ޗުއްޓީވެސް ދިމާވަނީ އެއް ދުވަސްވަރެއްގައި ކަމުން، ގިނަ އަދަދެއްގެ ބަޔަކު ދަނީ މާލެއިން ރަށްރަށަށް ދަތުރު ކުރަމުންނެވެ. އަދި ރާއްޖޭގެ އެއް ރަށުން އަނެއް ރަށަށް ދަތުރު ކުރުމުގައިވެސް މިއީ އެންމެ ބާރުބޮޑު ދުވަސްވަރެވެ. މި އަހަރު މި ދުވަސްތައް ދިމާވަނީވެސް ވިއްސާރަ އަދި ކަނޑު ގަދަ ދުވަސްވަރަކާއެވެ. މީގެ ކުރިން، މި ފަދަ ދުވަސްވަރު ދަތުރުފަތުރު ކުރުމުގައި ރައްކާތެރި ކަމުގެ ފިޔަވަޅުތަކަށް ސަމާލުކަން ނުދެވުމުން ހިތާމަވެރި ހާދިސާތައްވެސް ވަނީ ހިނގާފައިވެއެވެ.
