ރައީސް ޑރ.މުއިއްޒު ދެކުނުގެ ބައެއް އަތޮޅުތަކަށް ކުރެއްވި ދަތުރުފުޅުގައި ގދ.ގައްދުއަށް ވަޑައިގަތުމުން އެރަށު ކައުންސިލުން ކަންތައްކުރެއްވި ގޮތުން ހިތްހަމަ ނުޖެހން ފާޅުކޮށް، ގައްދޫ ކައުންސިލަށް ފާޑުވިދާޅުވުމުން، ކައުންސިލުންވެސް އެކަމުގެ ރައްދުގައި ބަޔާނެއް ނެރެފިއެވެ. އެ ބަޔާނުގައި ބުނެފައިވަނީ ގައްދޫއަށް ރައީސް ޑރ.މުއިއްޒު ވަޑައިގަންނަވާ ކަމުގެ މައުލޫމާތު ލިބުމުން ދައުލަތުގެ އެންމެ މަތީވެރިއަކަށް ދޭން ޖެހޭ މެހެމާންދާރީ ދިނުމުގެ ކަންކަން ކަމާ ބެހޭ މުއައްސަސަތަކާއި ގުޅިގެން ކުރިއަށް ގެންދެވުނު ކަމަށާއި، ގައްދޫ ކައުންސިލަށް ކުރެވޭނެ އެންމެ ރަނގަޅަށް އެކަން އިންތިޒާމުކޮށްފައިވާނެ ކަމަށެވެ. ނަމަވެސް ބައެއް ކުންފުނިތަކާއި ސަރުކާރުގެ ބައެއް މުއައްސަސާތަކުން އެކަށީގެންވާ ގޮތެއްގައި އެއްބާރުލުން ނުލިބުނުކަމަށް ހިތާމައާއި އެކު ފާހަގަކޮށްފައިވެއެވެ.
މީގެ އިތުރުން ރައީސް ޑރ.މުއިއްޒު ގައްދޫ ރައްޔިތުންނާ މުހާތަބު ކުރައްވައި ވާހަކަފުޅު ދެއްކުވުމަށް ހަމަޖެހިފައިވާ ހަފްލާގައި ކައުންސިލު ރައީސްވެސް ވާހަކަ ދެއްކެވުމަށް ހަމަޖެހިފައިވިޔަސް ފަހުވަގުތު އެޖެންޑާ ބަދަލު ކުރީ ކައުންސިލުގެ ރައީސް ހާޟިރުނުވުމުން ކަމަށް ރައީސް މުއިއްޒުގެ ވިދާޅުވީދތީ އެކަމަށްވެސް ކައުންސިލުން ވަނީ ޖަވާބުދީފައެވެ. ކައުންސިލުން ބުނެފައިވަނީ އެކަން ކުރުމަށް އެންމެ ބޮޑު ހުރަހެއް އެޅުނީ މިނިސްޓަރުންގެ ޕްރެޝަރާއި ހެދި ކަމަށެވެ. އެގޮތުން ދައުލަތުގެ ބައެއް މިނިސްޓަރުން ބޭނުންވީ ކައުންސިލު ރައީސްގެ ވާހަކަ ވަކި ގޮތަކަށް ހުރުން ކަމަށާއި އެގޮތަށް އެކަމެއް ނުކުރެވޭނެކަން ކައުންސިލުން ދެކޭ ކަމަށެވެ. މިކަމަކީ ރައީސްގެ ގައްދޫ ދަތުރުފުޅާއި ވެސް ހިލާފު ކަމެއް ކަމަށާއި، ދައުލަތުގެ މުދަލާއި ފައިސާ އިސްރާފުކޮށްގެން ސިޔާސީ ކަންތައްތަކެއް ހިންގުމަށް ހީލަތްތެރި ރޭވުމެއްގެ ތެރެއަށް ދަތުރު ބަދަލުކޮށްފައިވާ ކަމަށްވެސް ކައުންސިލުގެ ބަޔާނުގައިވެއެވެ.
ކައުންސިލު ރައީސްގެ ހިތާބަށް ހުރަސްއަޅައި ވަކި ގޮތަކަށް ވާހަކަދައްކަން މަޖުބޫރުކުރުވީ އެޑިޔުކޭޝަން މިނިސްޓަރ ޝަފީއު ކަމަށް ބެލެވެއެވެ. އެއީ އެ ޖަލްސާ ނިމުމުންވެސް އެންމެ ބޮޑަށް ކައުންސިލަށް ފާޑުކިޔައި ހިތްހަމަ ނުޖެހުން ފާޅުކުރެއްވީ މިނިސްޓަރ ޝަފީއުއެވެ.
