ސަރުކާރަށް ފާޑުކިޔައި ހިޔާލު ފާޅުކޮށްފައިވާ ބައެއް ވެބްސައިޓުތަކާއި ނޫސްތަކަށް ނުވަދެވޭގޮތް ހަދައިފިއެވެ. މިކަމުގައި ޓެލެކޮމިޔުނިކޭޝަން އޮތޯރިޓީގެ ބަހެއް ލިބިފައި ނުވާއިރު އެ ނޫސްތަކުގެ ސޯސަލް މީޑިއާ އެކައުންޓުތަކުން ބުނެފައިވަނީ އެއްވެސް އިންޒާރެއްނުދީ އެ ސައިޓު ތަކަށް ނުވަދެވޭ ގޮތް ހަދާފައިވާ ކަމަށެވެ. މީގެ ތެރޭގައި ހިމެނެނީ ކުރުސީ.ކޮމް، ހީރަސް، ދިޔަވަރު އޮންލައިންއެވެ. އަދި ރަޖިސްޓްރީކޮށްގެން ހިންގާ ބައެއް ނޫސްތަކަށްވެސް ނުވަދެވޭ ކަމުގެ ޝަކުވާ ކުރާއިރު ސަރުކާރުގެ ތަރުޖަމާނު މުހައްމަދު ޝަހީބު ވިދާޅުވެފައިވަނީ ރެޖިސްޓްރީކޮށްގެން ގަވައިދުން ނެރޭ އެއްވެސް ނޫހެއް ބްލޮކްކޮށް ނުވަދެވޭ ގޮތް ހަދާފައި ނުވާނެ ކަމަށެވެ.
މި މައްސަލާގައި މޯލްޑިވްސް ޖާނަލިސްޓު އެސޯސިއޭޝަން، އެޑިޓަރސް ގިލްޑު އަދި ބައެއް ސިޔާސީ ޕާޓީތަކުން ވަނީ ނުރުހުން ފާޅުކޮށް ބަޔާން ނެރެފައެވެ. އެ ފަރާތްތަކުން ބުނަނީ ވެބްސައިޓެއް ނުވަތަ ނޫހަކަށް ފިޔަވަޅު އަޅަން ޖެހޭނި ސަބަބު ބަޔާންކޮށްފައި ކަމަށާއި އެކަމުގެ އެއްވެސް ސަބަބެއް ބަޔާންނުކޮށް ނުވަތަ އިންޒާރެއްނެތި އެއްވެސް ނިއުސް ވެބްސައިޓެއް ’ބަންދެއް‘ ނުކުރެވޭނެ ކަމަށެވެ.
