މި ވަގުތު ރާއްޖޭގައި ހުރި އެންމެ މަޝްހޫރު އެއް ލަވަކިއުންތެރިޔާ ޝަލަބީ އިބްރާހިމް ގެ ތާއިދު އޮތީ ރައީސް އިބްރާހިމް މުހައްމަދު ސޯލިހަށް ކަމަށްބުނެފިއެވެ. ޝަލަބީ މިގޮތަށް ނިންމީ ވޭތުވެދިޔަ 5 އަހަރު (ރައީސް ސޯލިހުގެ ވެރިކަމުގައި) ޝަލަބީ ފަދަ ފަންނާނަކަށް ލިބެން ޖެހޭ ފުރުސަތުތައް ހަމަހަމަކަމާއި އެކު ލިބުމާއި އަދި އެހެން ފަންނާނުންނަށްވެސް މިނިވަންކަމާއި އެކު ކުރިއަށް ދިއުމުގެ ފުރުސަތުތައް ލިބުމުން ކަމަށެވެ.
މީގެ ކުރިން އެއްވެސް ސިޔާސީ ޕާޓީއަކަށް ތާއިދު ނުކުރާ އަދި ކެމްޕޭނު ހަރަކާތެއްގައިވެސް ބައިވެރިނުވެ ހުރުމަށް ފަހު ޝަލަބީގެ މި ނިންމި ނިންމުމާ ބެހޭގޮތުން ބުނެފައިވަނީ މިއީ ޝަލަބީގެ އަމިއްލަ ނިންމުމެއް ކަމަށާއި އެއްވެސް ފަރާތެއްގެ ނުފޫޒެއް ނެތި އަމިއްލަ ވިސްނުމަށް ބަލާއިރު، ވޭތުވެދިޔަ 5 އަހަރާއި އޭގެ ކުރީގެ 5 އަހަރުގައި ކަންކަން ވެފައި ހުރި ގޮތްތަކަށް ބަލާއިރު ރައީސް ސޯލިހަކީ ހިތްތިރި އޯގާތެރި ވެރިކަމެއް ކުރުމަށް އެންމެ ރަނގަޅު އެއް ބޭފުޅަކަށްވާތީ ރައީސް ސޯލިހަށް ދިން ތާއިދެއްކަމަށެެވެ.
މޯލްޑިވިއަން އައިޑޮލް ފުރަތަމަ ސީޒަނުން އާއްމުންގެ ތެރެއަށް މަޝްހޫރުވި ޝަލަބީ އެންމެ ފާހަގަ ކުރެވެނީ، އައިޑޮލްއިން ނުކުތް ގިނަ ފަންނާނުންނާ ހިލާފަށް އެއް ފެންވަރެއްގައި، ވަކީ އުސޫލެއް ހިފަހައްޓާ ފަންނާނެއްގެ ގޮތުގައެވެ.
ލަވަކިއުމުގެ އިތުރުން ގައުމީ ފެންވަރުގެ ގުރުއާން މުބާރާތްތަކުން ވަނަ ހޯދާފައިވާ ޝަލަބީ އަކީ ގިނަ އަދަދެއްގެ އަމިއްލަ ރާގުގެ މަދަހަ ނެރެފައިވާ އަދި ރާއްޖޭގެ އެކި ރަށްރަށުގައި ބާއްވާ މަދަހައާއި ގުރުއާން މުބާރާތްތަކުގެ ފަނޑިޔާރު ކުރަމުންދާ އެންމެ ބިޒީ ފަންނާނެވެ. މީގެ އިތުރުން ސްކޫލު ކުދިންނާއި އާއްމުންނަށް ލަވައާއި މަދަހަ ޓްރެއިނިން ވޯކްޝޮޕްތައް ހިންގައި މި ދާއިރާގައި ގިނަ ހިދުމަތްތަކެއް މިހާރުވެސް ދަނީ ކުރަމުންނެވެ.
ޝަލަބީގެ ރީތި ލަވަތަކުގެ ސައުންޑް ކުލައުޑް ހިޓްސް އެތައް މިލިއަން ގައި އުޅޭ އިރު ސޯސަލް މީޑިއާގައި ފޮލޯ ކުރާ މީހުންގެ އަދަދު ރާއްޖޭގައި އެންމެ ގިނަ އެއް ފަންނާނަކީ ވެސް ޝަލަބީއެވެ.
