ކަރަންޓު ބިލަށް ލުޔެއް ދިނުމަށްޓަކައި ބިލު ހިސާބުކުރުމުގައި ގެންގުޅޭ ބޭންޑްތަކުގެ ބަދަލުގައި ފްލެޓު ރޭޓު ކަނޑައަޅައި އެ ގޮތަށް ބިލު ކުރުމަށް ސްޓެލްކޯއަށް އަންގަވާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރޭ ބޭއްވި ރިޔާސީ ކެމްޕޭން ހަރަކާތް، ހުވަދޫ ޖަގަހަ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ލިބޭ އާމްދަނީން ކުއްޔާއި ކަރަންޓު ބިލު ދައްކާފައި، ކެއުމާއި ދިރިއުޅުމުގެ ކަންތައްތައް ހަމަނުޖެހޭކަމުގެ ކަންބޮޑުވުން ރައްޔިތުން ހިއްސާކުރަމުން އަންނަ ކަމަށެވެ.
”ކަރަންޓު ބިލަށް ލުޔެއް ހޯދުމަށްޓަކައި އެކަމަށް އަޅުގަނޑަށް އެދުނު. މިހާރު މިވާ ގޮތަކީ ކަރަންޓު ވަކި ރޭޓުތަކެއް މި ހުންނަނީ. ވަކި ވަރަކަށްވުރެ ގިނައިން ބޭނުންކޮށްފިއްޔާ، އަގު ބޮޑުވަމުން މިދަނީ. އަޅުގަނޑުމެން މިއަދު މި ނިންމަނީ މީހުން ދިރިއުޅޭ ކޮންމެ ގެއެއްގައި ވެސް ކަރަންޓު ރޭޓު ފުލެޓު ރޭޓަކުން ނަގާ ގޮތަށް. ކިތަންމެ ގިނައިން ކަރަންޓު ބޭނުންކުރިޔަސް، އެ ބޮޑުވާ ނިސްބަތް ބޮޑުވެގެންނެއް ނުދާނެ. ހަމަ އެއް ރޭޓަކުން އަޅުގަނޑުމެން މިއަދު އެ ބަދަލު މި ގެންނަނީ،“ އެމަނިކުފާނު ވިދާޅުވިއެވެ.
ރައީސް ވިދާޅުވީ އެމަނިކުފާނަށް މި ބަދަލުތައް ގެނެސް މިހާރުވެސް ފަށާފައިވާ ތަރައްގީގެ ބިޔަ މަސައްކަތްތައް ކުރިއަށް ގެންދެވޭނީ އެމަނިކުފާނު ދެވަނަ ދައުރަކަށް އިންތިހާބުވެގެން ކަމަށާއި އެހެން ކަމުން ރިޔާސީ އިންތިހާބުގެ ދެވަނަ ބުރުގައި ރައްޔިތުން ފުންކޮށް ވިސްނައި އެމަނިކުފާނަށް ވޯޓު ދެއްވުމަށް އިލްތިމާސް ކުރެއްވިއެވެ.
