ހައުސިން ޑެވެލޮޕްމެންޓް ކޯޕަރޭޝަން (އެޗްޑީސީ)ގެ ޗެއާމަންގެ މަގާމުން އަހުމަދު ޒުހޫރު މިއަދު ކުއްލި ގޮތަކަށް ވަކިކޮށްފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ)ން އެކްސްގައި ކުރި ޕޯސްޓެއްގައި ބުނީ ޒުހޫރު އެޗްޑީސީގެ ޗެއާމަންގެ މަގާމުންނާއި ބޯޑުގެ ޑިރެކްޓަރު ކަމުން މިއަދުން ފެށިގެން ވަކިކޮށްފައިވާ ކަމަށެވެ. ނަމަވެސް ވަކިކުރި ސަބަބެއް ހާމަކޮށްފައިނުވެއެވެ.
އެޗްޑީސީގެ ޗެއާމަންގެ މަގާމަށް ޒުހޫރު އައްޔަން ކުރީ މިދިޔަ ފެބްރުއަރީ މަހުގެ ތެރޭގައެވެ.
ޒުހޫރު ވަނީ މީގެ ކުރިން ސަރުކާރާއި ދައުލަތުގެ ކުންފުނިތަކުގައި އިސް މަގާމުތަކެއް ފުރުއްވައިފައެވެ. އެގޮތުން ޔޫތު މިނިސްޓަރު ކަމާއި ހެލްތު މިނިސްޓަރު ކަމާއި ހޯމް މިނިސްޓަރު ކަމާއި ރައީސް އޮފީހުގެ މިނިސްޓަރުކަން ވެސް އޭނާ ކުރައްވައިފައިވެއެވެ. މީގެ އިތުރުން ކަސްޓަމްސްގެ ކޮމިޝަނާ ޖެނެރަލް ކަމާއި ސްޓެލްކޯގެ މެނޭޖިން ޑިރެކްޓަރުކަން ވެސް ޒުހޫރު ކުރެއްވިއެވެ.
އެޗްޑީސީގެ ޗެއަމަން ޒުހޫރާއި ބެހޭ ގޮތުން އެއްވެސް މައްސަލައެއް އާއްމުންގެ ތެރޭގައިވެސް އަދި މީޑިއާގައިވެސް ދެކެވެމުން ނުދާއިރު، ޒުހޫރު ވަކިކުރި ސަބަބެއް ސަރުކާރުންވެސް ހާމައެއް ނުކުރެއެވެ. ނަމަވެސް ޕީއެންސީގެ ބައެއް މެމްބަރުން ތުހުމަތުކުރާ ގޮތުގައި ޒުހޫރަކީ ކުރީގެ ރައީސް ޔާމީނުގެ ވަރަށް އަރިސް ބޭފުޅަކަށްވެފައި، މިހާރުވެސް ޔާމީނާއި ގުޅުން ބާއްވާތީ، ޒުޙޫރު ވަކި ކުރަން ކުރިންވެސް ވަނީ ނިންމާފައެވެ.
