ޕީއެންސީގެ ޕީޖީ ލީޑަރަކީ ސުޖާއެއް ނޫން، ފަލާހު

ކުރިން ހީކުރި ގޮތާއި ހިލާފަށް ޕީއެންސީގެ ޕީޖީ ގުރޫޕުގެ ލީޑަރަކަށް އިނގުރައިދޫ ދާއިރާގެ އިންތިހާބީ މެމްބަރު އިބްރާހިމް ފަލާހަށް ދިނުމަށް، ރައީސް ޑރ.މުހައްމަދު މުއިއްޒު ހުށައަޅުއްވައިފިއެވެ.

މިއަދު މުލިއާގޭގައި އޮތް ބައްދަލުވުމެއްގައި ޕީއެންސީގެ ޗެއަމަން ހައިސިއްޔަތުން ރަޢީސް ޑރ.މުހައްމަދު މުއިއްޒު ހުށައެޅުއްވީ ވިހި ޕީއެންސީގެ ޕާލިމެންޓަރީ ގްރޫޕްގެ ލީޑަރު ކަމަށް އިނގުރައިދޫ ދާއިރާގެ އިންތިޚާބީ މެންބަރު އިބްރާހީމް ފަލާހު، އަދި ސީނިއާ ޑެޕިއުޓީ ލީޑަރަކަށް ބާރަށު ދާއިރާގެ މެންބަރު އިބްރާހީމް ޝުޖާއުއެވެ. މި ހުށައެޅުއްވުމަށް ބައްދަލުވުމުގައި ބައިވެރިވި ހުރިހާ މެމްބަރުންގެ ރުހުންވަނީ ލިބިފައެވެ.

ތިން ނައިބު ލީޑަރުން ގެ ގޮތުގައި ރައީސް ހުށައެޅުއްވައި ފާސްކުރެވުނު ފަރާތްތަކަކީ:

• މަހިބަދޫ ދާއިރާގެ މެންބަރު އަހްމަދު ތޯރިގް – ޑެޕިއުޓީ ލީޑަރު
• ހުޅުދޫ ދާއިރާގެ މެންބަރު މުހައްމަދު ޝާހިދު – ޑެޕިއުޓީ ލީޑަރު
• ވިލިމާލެ ދާއިރާގެ މެންބަރު މުހައްމަދު އިސްމާއީލް – ޑެޕިއުޓީ ލީޑަރު

ޕީޖީ ލީޑަރަކަށް އައްޔަނުކޮށްފައިވާ ފަލާހަކީ، 18 ވަނަ ރައްޔިތުންގެ މަޖިލިހުގައި ވެސް އިނގުރައިދޫ ދާއިރާގެ މެމްބަރުކަން ކުރެއްވި ބޭފުޅެކެވެ. އޭނާ ވަނީ މިދިޔަ އަހަރުގެ ފަހުކޮޅު ޕީޕީއެމް ދޫކުރައްވައި ޕީއެންސީއާ ގުޅިވަޑައިގެންފައެވެ. މީގެ ކުރިން ޕީޕީއެމްގެ އިސް ހަރަކާތްތެރިއެއްގެ ގޮތުގައި އުޅުއްވި ފަލާހުވަނީ ރައީސް ޔާމީނަށް އިންތިހާބު ނާކާމިޔާބުވުމުން ޕާޓި ދޫކުރައްވާ ސިޔާސީ ހަރަކާތްތަކާއި ދުރުގައި އުޅުއްވާފާއެވެ. މި ފަހުން ސިޔާސީ ކަންމުގައި ހަރަކާތްތެރިވާން ފެށީ ރިޔާސީ އިންތިހާބުގައި ރައީސް މުއިއްޒަށް ތާއިދު ހޯއްދެވުމުގެ ހަރަކާތްތަކުގެ ތެރެއިންނެވެ.

ޕީއެންސީގެ ބައެއް މެމްބަރުންނާއި އަދި ސިޔާސީ ފަރާތްތަކުން ގަބޫލުކުރަމުން އައީ މި ފަހަރުގެ ޕީއެންސީގެ ޕީޖީ ލީޑަރުގެ މަގާމަށް ހަމަޖައްސާނީ ބާރަށު ދާއިރާގެ މެމްބަރު އިބްރާހިމް ސުޖާއު ކަމަށެވެ. ސުޖާއު އަކީ ރައީސް ޔާމީނުގެ ވެރިކަމުގެ ދުވަސްވަރާއި އަދި އިންތިހާބުން ނާކާމިޔާބު ވުމުން ޕިޕީއެމްގެ ހަރަކާތްތަކުގައި އެންމެ އިސްކޮށް އުޅުއްވި ފަރާތެވެ. ރައީސް ޑރ.މުހައްމަދު މުއިއްޒުގެ ރިޔާސީ އިންތިހާބުގައިވެސް ސުޖާއުވަނީ އިސް ދައުރެއް އަދާކުރައްވާފައެވެ.

ވިހިވަނަ މަޖިލީސް ހުވާކުރުން އަންނަ އަންގާރަ ދުވަހު އޮންނާނެއެވެ. ހުވާ ކުރުމަށް ފަހު، ބާއްވާ އެންމެ ފުރަތަމަ ޖަލްސާގައި އޮންނާނީ ރައްޔިތުންގެ މަޖިލީހުގެ ރައީސާއި ނައިބު ރައީސް އިންތިޚާބުކުރަން ސިއްރު ވޯޓެއް ނެގުމެވެ.