މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ މެނޭޖިން ޑިރެކްޓަރުކަމުން ފާތިމަތު ތައުފީގު (ކުޑީ) ވަކިކޮށްފި އެވެ.
ފާތިމަތު ތައުފީގު މަގާމުން މިއަދު ވަކިކުރި އިރު އެ ތަނުގެ ހިންގުން ބޮއްސުންލައި، ހިޔާނާތުގެ ބޮޑެތި ތުހުމަތުތަކެއްގެ މައްސަލަތަކެއްވެސް ވަނީ ފެންމަތިވެފައެވެ. މި ގޮތުން ފައިނޭންސް ޑިޕާމަންޓަށް ނޭންގި ބޮޑެތި ހަރަދުތަކެއް ކުރުމާއި، ޕޮރޮކިއުމަންޓުގެ ގަވައިދާއި އުސޫލާ ހިލާފަށް މުދަލާއި ހިދުމަތް ހޯދުމުގެ މައްސަލަ ހިމެނެއެވެ. މީގެ އިތުރުން އަގުބޮޑުކޮށް (ބިޒުނަސް ކުލާހުގައި) ދަތުރު ނުކުރުމަށް ފިނޭންސް މިނިސްޓްރީން އަންގާފައިވަނިކޮށް، އަގުބޮޑު ދަތުރުތައް ކުރުމާއި، އެމްއެމްޕީއާރުސީ ބޯޑުގެ ޗެއަމަންގެ ލަފާ ގަބޫލުނުކުރުމާއި އެތަނުގެ ބޯޑުން ފާސްކުރާ ގޮތާ ހިލާފަށް ކަންތައްތައް ކުރާ މައްސަލަވެސް ވަނީ ފާހަގަކުރެވިފައެވެ. މި މައްސަލާގައި ރޭގެ ވަގުތެއްގައި އެމްއެމްޕީއާރުސީގެ ޗެއަމަންގެ މަގާމުން ނޫރުއައިން ޖަނާހު ވަނީ އިސްތިއުފާ ދެއްވާފައެވެ. މީގެ އިތުރުން އެމްއެމްޕީއާރުސީގައި ޓުއަރިޒަމް ދާއިރާގެ ފަރާތުން ތަމްސީލުކުރައްވާ ޑިރެކްޓަރުވެސް ވަނީ މިއަދު އިސްތިއުފާ ދެއްވާފައެވެ.
ފާތިމަތު ތައުފީގު (ކުޑީ) އަކީ ރައީސް ޑރ.މުހައްމަދު މުއިއްޒުގެ ވަރަށް އަރިހުގައި ރިޔާސީ އިންތިހާބުގައި ކެމްޕޭނު ކުރެއްވި އެ ޕާޓީގެ އިސް އެކްޓިވިސްޓެކެވެ. އިންޑިއާގެ ވެރިންނަށް ފުރައްސާރަކޮށް ޓުވީޓު ކުރި މައްސަލާގައިވެސް ކުޑީއާއި ދެކޮޅަށް ފިޔަވަޅު އަޅާފައި ނުވެއެވެ.
