އެމްއެމްޕީއާރުސީގެ ޗެއަމަންގެ މަގާމުން ކުއްލި ގޮތަކަށް އައިޝާ ނޫރުއައިން ޖަނާހު އިސްތިއުފާ ދެއްވައިފިއެވެ.
ރައީސް ޑރ.މުހައްމަދު މުއިއްޒުގެ ޕްރިންސިޕަލް އެޑްވައިޒާ އޮން ޓްރޭޑް އެންޑް އިންވެސްޓްމަންޓު މުހައްމަދު އަލީ ޖަނާހުގެ ދަރިކަނބަލުން، ނޫރުއައިން އެމްއެމްޕީއާރުސީގެ ޗެއާޕާސަންގެ މަގާމަށް އައްޔަން ކުރީ ޑިސެމްބަރު 27، 2023 ގަ އެވެ.
އެމްއެމްޕީއާރުސީ އަދި ޓުއަރިޒަމް މިނިސްޓްރީގެ ފަރާތުން ބޭރުގެ ހަފްލާތަކާއި މީޑިއާތަކުގައި ރާއްޖެ ތަމްސީލުކުރުމުގައި މި ފަހުން ހަރަކާތްތެރިވީ ނޫރުއައިންއެވެ. ނޫރުއައިން ގެ މަސައްކަތަށް ރައްޔިތުންގެ ފަފަރާތުން ވަރަށް ބޮޑަށް ތައުރީފު ލިބުނު އިރު އެ ދެ މުއައްސަސާގެ ވެރިން ނޫރުއައިންގެ މަސައްކަތާއި ހިތް ހަމަ ނުޖެހޭ ކަމަށް ސޯސަލް މީޑިއާގައި ވާހަކަދެކެވެއެވެ. ހާއްސަކޮށް ޓުއަރިޒަމް މިނިސްޓަރ އިބްރާހިމް ފައިސަލް އާއި ނޫރުއައިން މައްސަލަ ޖެހި ބޭރުގެ ހަފްލާތަކަށް ނޫރުއައިން ނުފޮނުވުމަށް އެމްއެމްޕީއާރުސީއަށް އަންގަވާފައިވާ ކަމަށްވެއެވެ. ސަރުކާރު ގެ އޮފިޝަލަކުވެސް ވިދާޅުވީ އެމްއެމްޕީއާރުސީގެ މެނޭޖިން ޑިރެކްޓަރު ފާތުމަތު ތައުފީގު (ކުޑީ) އާއި ޓުއަރިޒަމް މިނިސްޓަރ ފައިސަލް ގެ ހިތްހަމަ ނުޖެހުން އޮންނަކަން ނޫރުއައިންއަށް އެނގިވަޑައިގަންނަވާ ކަމަށާއި، އެހެންވިޔަސް ކުއްލިއަށް އިސްތިއުފާ ދެއްވި ސަބަބެއް (އެބޭފުޅާއަށް) އެނގިފައިނުވާ ކަމަށެވެ. އިތުރަށް މައުލޫމާތު ދެމުން އޮފިޝަލު ވިދާޅުވީ ނޫރުއައިން މަސައްކަތް ކުރެއްވީ ފާތުމަތު ތައުފީގު (ކުޑީ) އަދި ޓުއަރިޒަމް މިނިސްޓަރ ފައިސަލްގެ ނާގާބިލުކަމާއި ބަސްމޮށުންތެރިކަން ކޮށި ކަމަށް އާއްމުންނަށް އަންގައި، އޭގެ ނާޖާއިޒު ފައިދާ ނަގައިގެން އަމިއްލައަށް ޕްރޮމޯޓުވުމަށް ކަމަށާއި އެ ފުރުސަތު ރައީސް ޑރ.މުހައްމަދު މުއިއްޒު ނުދެއްވާނެ ކަމަށެވެ.
ނޫރުއައިން ގެ އިސްތިއުފާއަށް ސަރުކާރަށް ތާއިދުކުރާ ސޯސަލްމީޑިއާ އެކްޓިވިސްޓުން އަންނަނީ ވަަރަށް ބޮޑަށް ފާޑުކިޔައި ފުރައްސާރަކުރަމުންނެވެ.
