ހެލްތު ޕްރޮޓެކްޝަން އޭޖެންސީ (އެޗް.ޕީ.އޭ) ގެ ގައިޑްލައިންތަކާއި ހިލާފުވެގެން ދެ ކައިވެނި ޕާޓީއެއް ހުއްޓުވައިފިއެވެ.
ފުލުހުން މިއަދު މައުލޫމާތު ދީފައިވާ ގޮތުގައި، އެޗް.ޕީ.އޭ ގެ ގައިޑްލައިންތަކާއި ހިލާފުވެގެން ހުއްޓުވާފައިވަނީ ސޯލްޓް ކެފޭ އެންޑް ރެސްޓޯރެންޓްގައި ބޭއްވި ކައިވެނި ހަފްލާއާއި ދަ ގްރޭންޑު ވިއު ރެސްޓޯރެންޓު ގައި ބޭއްވި ކައިވެނި ހަފްލާއެވެ. މި ހަފްލާތައް ހުއްޓުވާފައިވަނީ މިއަދު ހަވީރު 05:30 ހާއިރުއެވެ.
މިކަމާއި ގުޅިގެން ސޯލްޓް ކެފޭ އާއި ދަ ގްރޭންޑު ވިއު 5000 ރުފިޔާއިން ޖޫރިމަނާ ކޮށްފައިވާ ކަމަށްވެސް ފުލުހުން ވަނީ ބުނެފައެވެ.
ޖެނުއަރީ މަހުގެ ފަހު ހަފްތާއިން ފެށިގެން ކޮވިޑް-19 އަށް ޕޮޒިޓިވްވާ މީހުންގެ އަދަދުތައް އިތުރުވުމާއި ގުޅިގެން، މުޅި ރާއްޖޭގައިވެސް އަޅާފައިވާ ފިޔަވަޅުތައް އެޗް.ޕީ.އޭ އިން ވަނީ ހަރުކަށިކޮށްފައެވެ. އެގޮތުން، ގްރޭޓަރ މާލެ ސަރަހައްދުގައި ގިނަ މީހުން އެއްވެ އުޅުން މަނާކޮށް، ޕާޓީ ފަދަ ހަފްލާތައްވެސް ބޭއްވުން ވަނީ މަނާކޮށްފައެވެ.
އަދި، 10 މީހުންނަށްވުރެ ގިނަ މީހުން އެއްވެ އުޅުން މަނާކޮށް ހަވީރު 06:00 އިން ފެށިގެން ހެނދުނު 06:00 އަށް ސައިކަލު ދުއްވުންވެސް ވަނީ މަނާކޮށްފައެވެ. މީގެއިތުރުން، ރޭގަނޑު 11:00 އިން ފަތިހު 04:30 އަށް ގްރޭޓަރ މާލެ ސަރަހައްދުގައި ކަރފިއުވެސް ވަނީ އިއުލާންކޮށްފައެވެ.
މީގެ ކުރިންވެސް ކައިވެނި ޕާޓީއަކުން ގިނަ އަދަދެއްގެ ބަޔަކު ވަނީ ކޮވިޑް19އަށް ޕޮޒިޓިވް ވެފައެވެ. އަދި އެ ހަފްލާ އިންތިޒާމުކުރި ފަރާތަށް އާއްމުންގެ ވަރަށްބޮޑު ފާޑުކިއުމެއްވެސް އަމާޒުވިއެވެ.
