މަޖިލީހުގައި ސިޔާސީ ޕާޓީއެއްގެ ގޮތުގައި ތަމްސީލްކުރުމުގެ ހައިސިއްޔަތު މޯލްޑިވްސް ނެޝެނަލް ޕާޓީ (އެމްއެންޕީއަށް) ގެއްލިއްޖެއެވެ.
މި ސަރުކާރުގެ އެޓާނީ ޖެނެރަލް ކަމާއި ހަވާލުވުމަށް ރައްޔިތުން މަޖުލީހުގެ ވިލިމާލެ ދާއިރާގެ މެމްބަރު އަހުމަދު އުޝާމު އިސްތިއުފާ ދެއްވުމާ ގުޅިގެން މަޖުލީހުގައި އެމްއެންޕީގެ މެމްބަރުންގެ ގޮތުގައި ތިއްބަވާނީ 2 މެމްބަރުންނެވެ. އެއީ ދަނގެތީގެ ދާއިރާގެ މެމްބަރު މުހައްމަދު ނާޒިމާއި ތިމަރަފުށީ ދާއިރާގެ މެމްބަރު އަބްދުﷲ ރިޔާޒެވެ.
ރައްޔިތުންގެ މަޖުލީހުގެ ގަވައިދު ބުނާގޮތުން ސިޔާސީ ޕާޓީއެއްގެ ގޮތުގައި ތަމްސީލު ކުރެވޭނީ މަދުވެގެން 3 މެމްބަރުން ތިބޭ ނަމައެވެ. މަޖުލީހަށް އިންތިހާބު ވުމަށް ފަހު އެއްވެސް ވަގުތެއްގައި 3 މެމްބަރުންނަށް ވުރެ މަދު ވެއްޖެ ނަމަ އެ ޕާޓީއެއް މަޖުލީހުގައި ތަމްސީލު ކުރުމުގެ ހައިސިއްޔަތު ގެއްލިގެން ދާނެއެވެ. މިއަދު މަޖުލީހުގެ ރިޔާސަތު ބަލަހައްޓަވަމުން ރައީސް މުހައްމަދު އަސްލަމް ވިދާޅުވީ އެމްއެންޕީގެ 2 މެމްބަރުން މަޖުލީހުގައި ތަމްސީލު ކުރާނީ އަމިއްލަ މެމްބަރުންގެ ގޮތުގައި ކަމަށެވެ.
