އުމުރުން 65 އަހަރުން މަތީގެ މީހުންނަށް ދެމުން އައި އެލަވަންސް 5000 ރުފިޔާއިން 7000 ރުފިޔާއަށް ބޮޑު ކުރުމަށް ރައީސް އިބްރާހިމް މުހައްމަދު ސޯލިހު ނިންމަވައިފިއެވެ. ރިޔާސީ އިންތިހާބުގެ ދެވަނަ ބުރުގެ ކެމްޕޭނު ހަރަކާތެއް ގައި މިރޭ ހުވަދޫ ޖަގަހައިގަ ވާހަކަފުޅު ދައްކަވަމުން ރައީސް ސޯލިހު ވިދާޅުވީ އެމަނިކުފާނު ރިޔާސީ އިންތިހާބުގެ ކެމްޕޭނުގެ ދަތުރުތަކުގައި އެކި ރަށްރަށަށް ވަޑައިގެން ރައްޔިތުންގެ ޝަކުވާ އަޑު އެއްސެވި އިރު އެންމެ ގިނައިން މީހުން ބުނަމުންދިޔަ އެއް ވާހަކަ އަކީ ދޮށީ އުމުރުގެ ރައްޔިތުންނަށް ދެމުން އަންނަ އެލަވަންސެއް ކޮންމެވެސް ބަދަލެއް ގެނެސް ދެއްވުމަށެވެ. އެހެންކަމުން ކުރިއަށް އޮތް އިންތިހާބުގައި އެމަނިކުފާނުގެ ރިޔާސީ ވައުދެއްގެ ގޮތުގައި އެކަން އެގޮތަށް ހަމަޖައްސައި 7000 ރުފިޔާއަށް ބޮޑުކޮށްދެއްވާނެ ކަމަށެވެ. މީގެ އިތުރުން ވަޒީފާއިން ރިޓަޔަރ ކުރަން ޖެހޭ އުމުރަކީ 65 އަހަރު ކަމަށް ވިޔަސް އޮޕްޝަނެއްގެ ގޮތުގައި 70 އަހަރަށް ރިޓަޔަރމެންޓު އުމުރު މަތިކުރުންވެސް އެ ވައުދުގައި މިރޭ ވަނީ ހިމަނުއްވާފައެވެ.
އެ ބަދަލުތައް ގެންނެވިކަން ރައީސް ސޯލިހު އިއުލާންކުރެއްވީ މިރޭ ބޭއްވި އެމަނިކުފާނުގެ ރިޔާސީ ކެމްޕޭން ހަރަކާތް، ހުވަދޫ ޖަގަހަ ޖަލްސާގައި ވާހަކަފުޅުދައްކަވަމުންނެވެ. ބައެއް ފަރާތްތަކުން އެކަމަށް ހެޔޮ ބަދަލެއް ގެނައުމަށް އެދިފައިވާތީ އެ ނިންމުން ނިންމަވާފައިވާ ކަމަށް ރައީސް ވަނީ ވިދާޅުވެފައެވެ.
ރައީސް އވިދާޅުވީ އެ މަނިކުފާނު ވައުދުވަމުންދާ ކަންތައްތައް ކޮށްދެވޭނީ ވެރިކަމުގައި ހުންނަވައިގެން ކަމަށާއި އެހެންކަމުން ރައްޔިތުން އެކަމާ ވިސްނެވުމަށް އެދިވަޑައިގަންނަވާ ކަމަށެވެ.
