ޖުމްހޫރީ ޕާޓީގެ އިސް ބޭފުޅުން ކަމަށްވާ ކުރީގެ މަޖްލިސް މެމްބަރު ރިޔާޒު ރަޝީދާއި، ޖޭޕީ ލީޑަރު ގާސިމް އިބްރާހިމްގެ ސްޕޯކްސް ޕަރސަން އަލީ ސޯލިހު އަދި އެ ޕާޓީގައި ގިނަ ދުވަސްތަކެއް ވަންދެން ހިދުމަތް ކުރަމުން އަންނަ އިސް ފަރާތެއް ކަމަށް ސައީދު، އިބްރާހިމް މުހައްމަދު ސޯލިހަށް ތާއިދު ކުރައްވަން ނިންމައިފިއެވެ.
ރައީސް އިބްރާހިމް މުހައްމަދު ސޯލިހަށް މި އިންތިހާބުގެ ދެވަނަ ބުރުގައި ތާއިދުކުރަން ނިންމައި ރިޔާޒު ރަޝީދު ކުރެއްވި އެކްސް މެސެޖުގައި ވިދާޅުވީ ”ޚާއްސަ މަޖިލިހުގަ އާއި ރައްޔިތުންގެ މަޖިލިހުގައި އަޅުގަނޱާއެކު އިސްލާހީގިނަ މަސައްކަތްތަކެއް ކުރައްވާފައިވާ މިހާރުގެ ރައީސުލްޖުމްހޫރިއްޔާ އަޅުގަނޱުގެ އަޚް އިބްރާހިމް މުޙައްމަދު ސޯލިހަށް މި ރިޔާސީ އިންތިޚާބުގެ ދެވަނަ ބުރުގައި ތާއީދުކުރަން އަޅުގަނޱު ނިންމައިފިން“ ކަމަށެވެ. ރިޔާޒު ރަޝީދަކީ ތ.ވިލުފުށީ ދާއިރާގެ މަޖްލިސް މެމްބަރުކަން ކުރެއްވި ބޭފުޅެކެވެ.
ޖުމްހޫރީ ޕާޓީގެ ލީޑަރު ގާސިމް އިބްރާހިމް ގެ ތަރުޖަމާނު އަލީ ސޯލިހުވެސް ގެންދަވަނީ ދެވަނަ ބުރުގައި ރައީސް އިބްރާހިމް މުހައްމަދު ސޯލިހަށް ތާއިދު ހޯއްދެވުމުގެ ގޮތުން މަސައްކަތް ކުރަމުންނެވެ.
އިސްލާހީ ސިޔާސީ މަސައްކަތުގެ އިސް އެކްޓީވިސްޓެއް ކަމަށްވާ ޖޭޕީ ސައީދުވެސް ގެންދަވަނީ ރައީސް އިބްރާހިމް މުހައްމަދު ސޯލިހަށް ތާއިދު ހޯދުމުގެ ގޮތުން ކެމްޕޭނުގައި ވަރަށް ބުރަކޮށް މަސައްކަތް ކުރަމުންނެވެ. ސައީދަކީ ރާއްޖޭގެ އިސްލާހި ސީޔާސީ މަސައްކަތްތަކުގައި އަދި ރައްޔިތުންނަށް ހައްގު ހޯދުމުގެ ކަންކަމުގައި އަބަދުވެސް ވަކާލާތު ކުރަމުންދާ ޖެހިލުން ކުޑަ ’އެކްޓިވިސްޓެކެވެ.‘ އެކަމުގެ ސަބަބުން އެކި ވަރުގެ އަނިޔާތައްވެސް ލިބިފައިވާ ކަމަސް ސައީދު ކުރިން ހާމަކޮށްފައިވެއެވެ.
