އެޗްޑީސީއިން ހިންގަމުންދާ ހިޔާނާތާއި ވައްކަމުގެ މައްސަލަތަކެއް ފަޅާ އެރުމުން ސަސްޕެންޑު ކުރި ބޯޑު މެމްބަރުން ސަރުކާރުގެ އެހެން ވަޒީފާތަކަށް އިއްޔެ ނުކުންނަން ފެށުމުން އާއްމުންގެ ފާޑުކިއުން އަމާޒުވެއްޖެއެވެ.
ސަރުކާރުގެ އޮފިޝަލަކު މުރާސިލަށް މައުލޫމާތު ދެމުން ބުނީ އެޗްޑީސީގެ ބޯޑު މެމްބަރުންނަށް ވަނީ ސަރުކާރުން އިތުރު އެހެން ވަޒީފާތަކެއްވެސް ދީފައެވެ. އެހެންކަމުން ސަސްޕެންޑު ކުރިއަސް ސަރުކާރުގެ އެހެނިހެން ވަޒީފާތަކުގައި އިއްޔެގަވެސް އެބޭފުުން އުޅުއްވާކަމަށެވެ. މި ގޮތުން އެޗްޑީސީގެ ބޯޑު މެމްބަރުންގެ ތެރެއިން ސަރުކާރުން އިތުރު ވަޒީފާ ދީފައިވާ ފަރާތްތަކުގެ ތެރޭގައި:
އަބްދުﷲ އަޒުހަރު:
ޑިސެމްބަރު 2023 ގައި އެޗްޑީސީގެ ބޯޑު މެމްބަރުކަމުގެ މަގާމަށް އައްޔަންކޮށްފައިވާ އަޒުހަރަކީ ހައުސިން މިނިސްޓްރީގެ ޑެޕިއުޓީ މިނިސްޓަރެވެ. އެޗްޑީސީގެއިތުރުން ހައުސިން މިނިސްޓްރީގައިވެސް އަޒުހަރަށް ވަކިން އޮފީސް ޖާގައެއް ވަނީ ހަމަޖައްސާ ދީފައެވެ.
އިބްރާހިމް ޔޫސުފު:
ރައީސް ޑރ.މުހައްމަދު މުއިއްޒުގެ ރިޔާސީ ކެމްޕޭނުގައި ދިމްޔާތު އޮފީހުގައި މަސައްކަތް ކުރެއްވި އިބްރާހިމް ޔޫސުފަކީ އެޗްޑީސީގެ ބޯޑު މެމްބަރެއްެގެ އިތުރުން މިނިސްޓްރީ އޮފް ޓުއަރިޒަމްގެ ސްޓޭޓް މިނިސްޓަރެވެ. އިބްރާހިމް ޔޫސުފު ގިނަ ވަގަުތު މަސައްކަތް ކުރައްވަނީ ޓުއަރިޒަމް މިނިސްޓްރީގައެވެ.
ފާތުމަތު މިޒްނާ އަލީ
ފާތުމަތު މިޒްނާ އަލީ އެޗްޑީސީގެ ބޯޑަށް އައްޔަންކޮށްފައިވަނީ ޑިސެމްބަރު 2023 ގައެވެ. ސިޓީ ކައުންސިލާއި އެމްޓީސީސީގައި މަސައްކަތް ކުރެއްވި މިޒްނާ މި ވަގުުތު އަދާކުރަމުންދަނީ ޕޮލިޓެކްނިކުގެ ލެކްޗަރަރއެއްގެ ވަޒީފާއެވެ.
ޔޫސުފް ވަހީދު:
މި އަހަރުގެ ސެޕްޓެމްބަރު މަހުގައި އެޗްޑީސީގެ ބޯޑު މެމްބަރަކަށް އައްޔަންކޮށްފައިވާ ޔޫސުފް ވަހީދަކީ އެސްއެމްއީ ޑިވެލޮޕްމެންޓު ފައިނޭންސް ކޯޕަރޭޝަނުގެ ވެރިއެކެވެ. މި ސަރުކާރުން ޔޫސުފް އައްޔަންކޮށްފައިވަނީ އެސްޑީއެފްސީ ގެ ޗީފް އިންޓަރނަލް އޮޑިޓަރުގެ މަގާމެވެ.
މީގެ އިތުރުން މި ބޯޑުގައި ދެން ހިމެނެނީ އަމިއްލަ ކުންފުނިތަކާއި ވިޔަފާރިތަކުގައި މި ވަގުތުވެސް އިސްކޮށް ހަރަކާތްތެރިވާ ފަރާތްތަކެވެ. މިގޮތުން މުހައްމަދު ވިޝާމަކީ މަޝްހޫރު ކޮންސްޓަރަކްޝަން ކުންފުނި އާރުސީސީ އަދި މެމްބަރު ނާޒިމު (ކާނަލް ނާޒިމު) އާއިލީ ބޭފުޅެއްގެ އިތުރުން އާއިލީ ވިޔަފާރީގައިވެސް އުޅުއްވާ ފަރާތެކެވެ. ބޯޑު މެމްބަރު އާރިފް އަބްދުއް ސަމަދަކީ ފުޅާ ދާއިރާއެއްގައި އަމިއްލަ އެތައް ވިޔަފާރިއެއް ހިންގާ ފަރާތެކެވެ. މި ގޮތުން އަމިއްލަ ކުންފުންޏެއް ކަމަށްވާ އެންޓްރަކް މޯލްޑިވްސް ވިޔަފާރީގައިވެސް ހިއްސާވެއެވެ. އެޗްޑީސީ ބޯޑު މެމްބަރު މުހައްމަދު ނާޖިލަކީ ރެޑްވޭވް ވިޔަފާރިތައް ހިންގާ ކުންފުނީގެ މެނޭޖިންގ ޑިރެކްޓަރެވެ. ކުންފުނީގެ އެހެނިހެން ހިއްސާދާރުންނަކީ އޭދަފުށީ ދާއިރާގެ މެމްބަރު އަހުމަދު ސަލީމާއި ބާރަށު ދާއިރާގެ މެމްބަރު އިބްރާހިމް ސުޖާއު އެވެ.
ޕީއެންސީގެ އޮފިޝަލަކު މުރާސިލަށް މައުލޫމާތު ދެމުން ބުނީ މި ވަގުތު ރާއްޖޭގެ އެންމެ ގިނަ މެމްބަރުން ހިމެނޭ އެއް ސިޔާސީ ޕާޓީ ކަމަށްވާ ޕީއެންސީ ގެ ވެރިކަމެއްގައި އެ ޕާޓީގައި ގާބިލު އެތައް ބަޔަކު ތިބި އިރު އެކަކަށް ދެ ވަޒީފާ ދީފައިވުމުން ޕާޓީގައި ގާބިލު މީހުން ނެތް ކަމަށް އާއްމުން ދެކޭނެ ކަމަށެވެ.
