މި މަހުގެ 14 ވަނަ ދުވަހުގެ ރޭ އާއްމު ފަރާތަކުން ހޮވައިގެން ގެނައި 10000 ރުފިޔާ އޭގެ ވެރި ފަރާތާއި ހަވާލުކޮށްފިއެވެ.
އެ ރޭ 12:04 ގައި އަމިއްލަ ފަރާތަކަށް، 1 ނަމްބަރު ޖެޓީ (ރަސްމީ ފާލަން ސަރަހައްދުން) ފެނުނު ސިޓީއުރައެއްގައި އޮތް ފައިސާތަށް ޕޮލިހާއި ހަވާލުކުރީ އެ ވަގުތު އެ ސަރަހައްދުން ވެރި ފަރާތް ނުފެނުމުންނެވެ.
އޭގެ ފަހުން ވެރިފަރާތް ނުފެނިގެން ޕޮލހުން ވަނީ ސޯސަލް މީޑިއާއި މީޑިއާތަކުގައި މައުލޫމާތު ހިއްސާކޮށްފައެވެ. ނަމަވެސް މިއަދު ވެރިފަރާތާއި ފައިސާ ހަވާލުކުރެވުނު ކަމަށް ބުނެ ކޮށްފައިވާ ކުރު ޓުވީޓު ފިޔަވައި އިތުރު މައުލޫމާތެއް ނުދެއެވެ.
ފައިސާތައް ހޮވި ފަރާތުގެ ތެދުވެރިކަމަށްޓަކައި އާއްމުންގެ ގިނަ ބަޔަކު ދަނީ އެ ފަރާތަަށް ތައުރީފުކުރަމުންނެވެ. މި ހާރަކަށް އައިސް ތަންތާ ބަހައްޓާ އެއްޗެހި ކުޑަ ވަގުތުކޮޅެއްގައި ގެއްލޭއިރު އެ ވަރުގެ ފައިސާތަކެއް ބޭނުން ނުކޮށް ވެރިފަރާތާއި ހަވާލުކުރުމަށް، ކަމާބެހޭ އިދާރާއަށް ހަވާލުކުރުމަކީ އެފަރާތުގެ ތެދުވެރިކަން ސާބިތުވާކަމެއް ކަމަށާއި ރަނގަޅު އިނާމެއް ދިނުމަށްވެސް ބައެއް ފަރާތްތަކުން ސޯސަލް މީޑިއާގައި ވަނީ ޝުއޫރު ފާޅުކޮށްފައެވެ.
